اهم نصيحة فى الحياة هيا الروقان والتناحة..لازم الواحد اول ما يقوم م النوم ياخد حبوب التناحة كده ع الريق عشان يقدريبلع اى حاجة ويطنش كل حاجة. اصل والله التناحة دى طلعت حاجة ظريفة اوى..يعنى تمشى فى الشارع ووتروح تركب عربيتك تلاقيها مزنوقة ويا سلام لو كانت العربية اللى راكنة قدام عربيتك خابطة فيها من الجمب.. وتلاقي كمان صاحب العربية اللى خبطتك هوا اللى نازل يتخانق معاك.. حاجة مضحكة اوى..انت بقى لو خلقك فى مناخيرك ممكن تتخانق معاه وتوريه شغله لكن لو حضرتك تنح وكوووووووول ولا هيفرق معاك بل بالعكس ده انت هتقوله انا متاسف اصل انا حمار ومش بعرف اسوق اعمل ايه بس فى نفسى ربنا يأخدنى بقى.(.انت كده مية مية وتقدر تعيش كويس من غير ما يجيلك ضغط ولا سكر.).ولما تروح مصلحة حكومية وتلاقيهم يغلسوا عليك او يفضلوا يشتغلوك ويقولوا لك كل شوية الورق ناقص الورق ناقص كأنها اغنية ..اوع تدايق وبص لهم وقولهم بابتسامة كبيرة اكيد انتوا برنامج الكاميرا الخفية!! عمالين تحرقوا فى دمى وتستفزونى لكن ده بعينكم..انا تنح وكوووول ومش ورايا حاجة غيركوا النهاردة..ولو رحت تشترى اى حاجة بقى واتفاجئت بان الاسعار غالية مثلا ولو ان دى حاجة نادر ما بتحصل لكن افرض مثلا رحت تشترى كيلو سكر لاقيته ب 60 جنيه..المفروض ساعتها تدى للراجل ورقة بمية..وتقوله وتحلف عليه جامد اوى: والله ما عايز الباقى خليه عشانك..وهيا دى برضه اسعار يا راجل؟؟ ده انتوا بتستعبطوا .!!.كده انتوا مدلعين الشعب اوى بصراحة..لما يبوظ بقى من كتر الدلع ما تبقوش تزعلوا ..!! متهيالى اننا لو نفذنا موضوع حبوب التناحة دى ممكن نلاقى الراجل وهوا ماشى اتخبط فى عمود نور من كتر مااهوا متنح والست تتكعبل ع السلم من سرحانها ماتفوقش الا وهيا عند دكتور العظام..والولد يعاكس البنت ويرخم عليها واحتمال يسرق شنطتها ويجرى وهيا تقول لصحبتها طنشى طنشى خليكى كوووووووول..والست تقول لبنتها جايلك عريس كويس اوى وهادى ومش هتلاقي حد فى اخلاقه و تناحته.!! وتروح تغيظ صحبتها جايلى عريس زى القمر وتنح تناحة..وتلاقى الاشارة حمرا والناس لسه متنحة برضه تقريبا مستنين اتوبيس يعدى يشيلهم كلهم
الثلاثاء، 28 ديسمبر 2010
الأحد، 26 ديسمبر 2010
يوميات سنة اولى جواززززززز....3
وادى اخرة الجواز..قاعدة لوحدك وزهقانة وطهقانة..اومال انتى فاكرة ايه ؟؟ وبعدين لازم تستحملى شوية وتيجى على نفسك شويتين وتحاولى تشوفى لنفسك هواية تعمليها او كتاب حلو تقريه وتستفيدى منه وما تبقاش كل سعادتك مرتبطة بوجود جوزك فى البيت..لازم تتعلمى ازاى تسعدى نفسك حتى وانتى لوحدك..وعلى فكرة الراجل لما بيقعد كتير فى البيت المشاكل بتزيد..يعنى تلاقيه ماسك لك عدسة مكبرة على اى حاجة صغيرة عملتيها..يعنى يعلق على كل حاجة..مثلا يعلق على نظافة البيت ويعلق على كلامك فى التليفون ويتريق عليكى..وياخد منك الريموت ويتفرج على الكورة اللى انت مش بتطيقيها..عشان كده ابعد حبة تزيد محبة..خلصنا كده من مشكلة الوحدة والفراغ..بالعكس احنا شفناها حاجة ايجابية كمان...نيجى بقى للمشكلة التانية الازليه ..وهيا الصمت..يعنى الراجل يجى من شغله ساكت وما يتكلمش..والست بقى بتتجنن من كده..اصل السكوت ده بيغيظ اوى..لانك مش بتبقى فاهمة هوا ساكت ليه..يعنى مثلا هوا ساكت عشان زهقان من شغله ولا عشان زهقان منى ولا ساكت عشان تعبان ولا ساكت عشان بيفكر فى حاجة مهمة والست بقى لو كان خيالها واسع شوية ممكن تفتكر انه مدام ساكت وسرحان يبقى يمكن بيخونها ولا بيحب عليها..والموضوع يكبر وتقوله انت ما بتحبنيش انت زهقان منى انت مش طايقنى..فاكرين احمد زكى وسعاد حسنى لما سالته: بتحبنى؟ قالها: ايوة يا ننوسة..رجعت سالته تانى: طب قد ايه.قالها : قد البسبوسة..فاتعضصبت عليه وقالت له: ماتحبنيش بالشكل ده..قام اتعصب هوا كمان وقالها: ما بحبكيش بالشكل ده..زعلت وقالت: اهوا قالى مش بيحبنى !!يا ناس يخلصكم كده!! وهيا كده فضلت توقعه فى الكلام لحد ما وقعته فى الغلط..ودايما فيه اتهام موجه للستات بانهم زنانين ونكديين..وانا شايفة ان ده مترتب على ده..يعنى لما هيا تزن على حاجة وماتحصلش تقوم تتقمص بقى وتزعل والجيران يجوا يسلكوا..وكل ده ليه؟؟عشان هيا زعلانة ان جوزها ساكت..طيب اهوااتكلم...استفدتى ايه بقى؟؟ ماتخليه ساكت احسن.. ساعات السكوت بيكون من ذهب..وبعد كده لما تلاقيه ساكت اسالى نفسك سؤال مهم..ياترى وهوا ساكت احسن ولا وهوا بيتخانق احسن..
الخميس، 23 ديسمبر 2010
يوميات سنة اولى جواززززززز....2
اكتر مشكلة بتواجه الست فى الجواز هيا الوحدة والفرااااااااااغ..اصلها بتبقى متاثرة شوية بالافلام العربى اللى بيجيبوا فيها العريس والعروسة طول النهار بيتفسحوا فى الحديقة وبياكلوا كوزين درة وبعد شوية موسيقة تصويرية ويجروا ورا بعض وممكن البطلة تخبط فى الحيطة والبطل يتزحلق فى قشرة موز وهوا ماشى.. وتلاقى شهر العسل عندهم واخد حقه اوى مش انتى اللى شهر العسل بتاعك كان حوالى خمس تيام. وداخل فيهم جمعة وسبت يعنى اجازة اصلا..ويجيبوا لك البطل قاعد فاضى ومفيش وراه شغل ولا مصالح وكل وظيفته فى الحياة انه يجرى ورا مراته فى الحديقة..(تقريبا البطل بيبقى واخد اجازة بدون مرتب عشان يفسح البطلة)وطبعا الست بتتصدم بقى بعد ما بتتجوز لان جوزها مش عاطل كده زى البطل ولازم ينزل عشان يشتغل عشان عنده اقساط عربية واقساط غسالة واقساط تكييف..وتبدأ بقى الزوجة تحس بالوحدة والملل والغربة..واول خناقة بتطفو ع السطح هيا الخناقة الشهيرة..(انت طول النهار سايبنى قاعدة لوحدى!!انت مش بتقعد معايا ليه؟؟) وطبعا جوزها هيرد عليها اول تلات شهور بذوق: متاسف يا حبيبتى..انتى عارفة الشغل ورخامته..اعذرينى بس اليومين دول..وبعد حوالى ست شهور الذوق بيقل شوية: معلش بقى اعمل ايه طيب!!وبعد سنة الراجل حس ان الذوق ما ينفعش مع مراته: اعمل لك ايه يعنى؟؟ اسيب الشغل يعنى و اقعد جمبك ..اصلك متدلعة وماعندكيش اى احساس بالمسئوليه....!!..طبعا جوزها العصبى ده لو كان حاول يفهمها من ايام الخطوبة طبيعة شغله او لو كانت هيا فهمته طبيعة شخصيتها وانها بتحب الاهتمام والدلع مكانش حصل كده من الاول..لكن تخيلى انك اشتريتى كيلو تفاح عشان تاكليه وبعد ما رجعتى البيت بصيتى فى الكيسة لاقيته عنب مش تفاح ..والعنب مش وحش بالعكس العنب حلو اوى وطعمه زى السكر لكن هيا كانت عايزة تفاح وكانت عاملة حسابها ان الكيسة فيها تفاح وحست ان كده البياع ضحك عليها وتروح للبياع وتقوله انت ضحكت عليا انا مش عايزة عنب ويفضل البياع يقنعها ده العنب حلو اوى ده هيعجبك..لكن خلاص هيا كده اتصدمت وحست انها انضحك عليها..عشان كده لازم الخطوبة دى نقضيها فى الكلام المهم يعنى بدل ما نفضل طول النهار نتكلم عن الوان الشقة والعفش هنشتريه منين والفرح هنعزم فيه كام شخص!! لازم نتكلم الاول عن نفسنا ونحاول نفهم بعض اكتر عشان نتفادى مشاكل كتيرر اوى ونحلها قبل ما تبتدى..
يوميات سنة اولى جواززززززز....1
سنة اولى جواز دى اصعب سنة فى حياة اى ست دى يمكن تكون اصعب من سنة الثانوية العامة كمان..اصل تخيلى كده ان انتى عايشة فى جو وبيئة معينة والمحروس جوزك برضه عايش فى جو وبيئة تانية خااااااااااااالص...يعنى مثلا عصفور وقع فى حب سمكة. هيعيشوا فين؟؟يا اما هيعيشوا فى البحر والعصفور هيتعب شوية ومش هيستحمل الامواج اللى اكيد هتقابلهم ولو السمكة هيا اللى عاشت فى الهوا لازم لها برضه جناحين وريش عشان تقدر تطير ده غير انها لازم تتوقع انه يكون فيه شوية عواصف واعاصيرورياح خماسين وتراب..(يعنى تعمل حسابها من الاول وماتعملش فيها فرفورة). المهم العصفور والسمكة دول اتقابلوا سوا قصدى انتى والمحروس جوزك اتقابلتوا واتهببتوا..سورى اقصد وحبيتوا بعض وشرارة الحب الاولى حصلت والحمد لله وبقيتوا بتعدوا الايام والليالى عشان تعيشوا سوا فى بيت واحد..ومخططين لكل حاجة من اول ديكورات الشقة والعفش وادوات المطبخ لحد لون باب الشقة كمان..يعنى عملتوا حساب كل حاجة الا حاجة واحدة وهيا ياترى الشخص اللى قدامى ده هيقدر فعلا يسعدنى..وياترى انا هقدر اسعده ولا هنكد عليه عيشته!! والموضوع بيبدأ من لحظة كتب الكتاب..ساعتها بتحسى انك اتدبستى رسمى..وبعد كام يوم الفرح والقاعة والمعازيم اللى جايين يتفرجوا عليكى...وانتى بتلبسى فستان ابيض حلو عيبه الوحيد الجيبونة المنفوشة دى اللى بتخليكى مش عارفة تتحركى وعريسك بيبقى لابس بدلة سودة ومنور اكتر من لمض الفرح..بتحسى ساعتها انك نجمة والناس كلها بتبص عليكى..فيه ناس بجد بتكون فرحانة عشانك وناس تانية فرحانة فيك وناس بتحقد عليكى...المهم بتفضلى سيادتك طول الفرح متوترة وخايفة المكياج يبوظ او خايفة يحصل موقف مش ظريف( مثلا مامتك تعض حماتك)..وتفضلى تقولى عدى يا ليلة..والحمد لله بتعدى الليلة عشان تبدأ بعدها ليالى كتيرة انتى اللى بتقومى ببطولتها لوحدك ومش معاكى حد يساعدك وتلاقى فجأة نفسك مسئولة عن بيت وزوج وبعد كده عيال حلوين مقطقطين.واول ما بيتقفل باب الشقة عليكوا بتحسى بشعور غريب..او بتحسى بكذا شعور فى وقت واحد ..يعنى شوية تحسى انك فرحانة ببيتك الجديد وشوية تانية تحسى ان مامتك وحشاكى ..شوية تنبسطى انك كبرتى ومسئولة عن كل حاجة فى البيت وبراحتك بقى..وشوية تانية تتمنى ترجعى لبيت باباكى عشان مامتك تدلعك وتهتم بيكى وماتشغليش بالك باى حاجة فى الدنيا..لكن اللى انتى متأكدة منه اوى انك مبسوطة عشان داخلة حياة جديدة ومرحلة تانية من حياتك لازم تبذلى كل جهدك عشان تخليها تنجح ومش نجاح عادى .. لازم نجاح مبهر وبتقدير امتياز كمان.....
الجمعة، 17 ديسمبر 2010
جاية تشتغلى ايه؟؟
المفروض ان كل واحد مهنته تعبر عنه يعنى الشغلانة اللى انت بتشتغلها تبان عليك وعلى طريقة لبسك واسلوب كلامك وشخصيتك لانك لازم تتاثر بمهنتك..انا مثلا مااقتنعش لو شفت دكتور ريجيم تخين اصلها مالهاش غير معنى واحد وهوا ان الدكتور ده فاشل فى انه يخسس نفسه طب يبقى هيخسس الناس ازاى؟؟ ومااقتنعش لو شفت شيف(طباخ) رفيع ومعصعص لان برضه دى معناها ان طبيخه وحش بقى او يمكن هوا اللى مابيحبش الاكل(جايز برضه)!!..فيه كمان مهن لازم تكون صحبتها جميلة جدا طول الوقت زى الممثلة لازم دايما تخرج وهيا على سنجة عشرة اصل افرضوا شافت حد من المعجبين بتوعها وكانت مش حاطة مكياج!! ساعتها الراجل اللى شافها هيروح يفضحها ويقول دى وحشة خالص ع الطبيعة و شبه العفريتة وطبعا مش هيبقى ليها معجبين بعد كده..الكوافيرة برضه لازم تفضل حاطة ميك اب على وشها 24 ساعة عشان تبقى مقنعة بالنسبة لى..الموديل برضه لازم تكون دايما رشيقة وغالبا بتكون طويلة كمان..مهنة بقى مصممة الازياء لازم تفضل انيقة طول الوقت وماينفعش مرة تستعبط وتلبس حاجة عادية..انا مرة سمعت مصممة ازياء فى التليفزيون بتقول للمذيع: بالنسبة للفستان اللى انا لابساه ده لونه جديد جدا تقدر تقول لونه فحلقى (بضم الفاء واللام )اما الشوز بقى لونها بحلقى( بضم الباء واللام)..الصراحة حسيت ساعتها انها مصصمة جلاليب مش ازياء!!بالنسبة بقى للحلاق لازم يكون دايما حالق شعره ع الزيرو عشان يثبت انه بيحلق كويس..والنجار لازم تلاقيه حاطط قلم رصاص ورا ودنه لكن لو لاقيته حاطط قلم جاف تعرف على طول انه مش متمكن من مهنته..والجزار لازم يكون بشنب مش عارفة ليه تقريبا عشان الخروف يخاف منه ويعمل له الف حساب..لكن التاجر او اللى عنده سلسلة محلات لازم تلاقيه لابس خاتم ذهب فى صابع ايده الصغير.!!.الدكتور بقى غالبا تلاقيه لابس نظارة( من كتر ما بيذاكروا ويدحوا نظرهم لازم يضعف طبعا)..ده غير ان الدكتور بتلاقيه وقور كده وراسى رغم انى مرة رحت لدكتورة اطفال عشان بنتى وبمجرد ما دخلت لاقيت الدكتورة شغلت اغنية( جدو على) وطلعت بالونة من درج المكتب وقاعدة تنفخ ..حسيت ساعتها انى دخلت سيرك مش عيادة..هوا الطب باظ من شوية!! مهندس الكمبيوتر غالبا برضه تلاقيه لابس نظارة من كتر قعدته ع الكمبيوتر طبعا وغالبا بتلاقيه تخين شوية لانه طول مااهوا قاعد كده عمال يلغ فى ساندوتشات غير انه ما بيتحركش كتير..مهندس الاتصالات بقى اكيد هتلاقيه بيرغى فى الموبايل طول النهار ...اغلب اللى بيشتغلوا فى التدريس هتلاقيهم ماشيين دايما بورقة وقلم فى شنطتهم وهتعرفهم من طريقتهم على طول..اعرف واحدة مديرة مدرسة لما بنروح نزورها فى البيت تقول لنا: اهلا وسهلا..اتفضلوا جلوس..ولو غلطت وقاطعتها فى نص الكلام ممكن تعاقبنى وتقولى قومى اقفى وارفعى ايدك لفوق..اللى بيشتغلوا بقى فى السياحة تلاقى فشتهم عايمة على طول.انت تدخل شركة سياحة مثلا وتقول للموظفة: مساء الخير..تلاقيها ترد عليكى بابتسامة كبيررة: مساء النور يا فندم هىء هىء.احنا عندنا رحلات روشة طحن هىءهىء هتعجبك اوى هىءهىء..(تقريبا بعد كل جملة ضحكة ).وفيه مهن تقليدية يعنى الضابط هتلاقيه طبعا منضبط اوى ومش بيعاكس البنات والسواق لازم تلاقيه رغاى ومندوب المبيعات لازم يجادل كتير فى الكلام وكل ماتتكلم معاه فى موضوع بسيط يقولك: يا تقنعنى يا اقنعك..كأنه هياخد عمولة منك فى الاخر لو اقتنعت بكلامه .وفيه فكرة احنا واخدينها من الافلام عن الفنان التشكيلى انه دايما ناكش شعره او المنتج انه دايما بكرش 4 متر قدامه او المصور انه دايما لابس نظارة شمس وكاسكتة. والمخرج لازم يكون عصبى وبيزعق دايما ولابس صديرى اما بقى بالنسبى للحرامى لازم تلاقيه لابس تى شيرت ابيض ومخطط باسود بالعرض!!.....انا اللى شاغلنى دلوقتى حاجة تانية..ياترى الصحفى او الكاتب المفروض يكون ايه شكله او شخصيته؟؟ اكيد الصحفى هيكون هادىء نوعا ما لانه مش بيعرف يعبر عن نفسه غير بالورقة والقلم لكن الصراحة انا قابلت مرة صحفى وكان رغاى رغى بس للامانه هوا كان سواق تاكسى كمان يعنى بيشتغل صحفى وسواق ويظهر انه اتاثر بمهنة السواق اكتر..
خليكى طفلة
خليكى طفلة دايما من جوة وبصى للاطفال واتعلمى وده عشان حاجات كتيررر...اول حاجة الاطفال بيفرحوا من اقل حاجة يعنى لو لعبتى مع بنتك ربع ساعة هتفرح اوى ولو اشتريتى لها عروسة ولا فستان هتزئطط ولو خرجتى تفسحيها هتنبسط جدااااااا..تانى حاجة الاطفال تلاقيهم بيضحكوا من غير سبب يعنى لو انتى عطستى جامد شوية هيسخسخوا م الضحك ..وكمان الاطفال زنانين اوى يعنى لما بيصمموا على حاجة بينفذوها ولما بيشبطوا فى حاجة لازم ياخدوها ورابع حاجة ودى احلى صفة فيهم صراحتهم يعنى مش مضطرين ينافقوا حد او يجاملوه ومش بيسمحوا لحد انه يلاعبهم الا لو ارتاحوا له بجد..وغير كده الاطفال اوفياء وعشريين اوى ولما بيحبوا حد بيتعلقوا بيه جدا.واهم حاجة انهم مش بيفكروا فى بكرة ولا شايلين همه وكل اللى شاغلهم اللحظة اللى هما فيها وبس...عشان كل ده بقولك خليكى طفلة..واوعى تنسى بقى التطعيمات!!
بحب الشمس
بحب اوى اصحى بدرى والاقى الدنيا منورة والشمس طالعة واسمع صوت عصفورة معدية جمب شباك اودتى وامسك الجرنان وأقرا براحتى قبل ما حد ياخده منى..وكوباية شاى بلبن ..ياااااه روقان والله..فين الايام دى؟ دلوقتى الواحد بقى بينام الصبح ويصحى المغرب او العصر كسلان وزهقان وشوية والدنيا هتظلم والشمس تروح والجو يبقى كئيب وتحس ان اللى حواليك عايزين يناموا!!وسبحان الله انت لسه صاحى..وطبعا الظهر اذن والعصر وانا لسه نايمة مع الهانم الصغيرة..هيا اللى مبوظة لى مواعيدى كلها..وده فى رايى من الاسباب اللى بتؤدى لاكتئاب بعد الولادة.(لو الدكاترة سمعونى هيقتلونى) بس انا شايفة انه من اهم الاسباب..تخيلى انتى لسه صاحية والناس عايزة تنام..وتخيلى انك صاحية والدنيا حواليكى ظلمة..ايه الاكتئاب ده؟..بس هنعمل ايه بقى؟. هما الاطفال كده..صحيح متعبين وزنانين ورغايين وقماصين بس والله زى العسل برضه..اول ما يناموا الواحد بيحس بفراغ كبير..انا بس كل مشكلتى انى بحب اصحى ألاقى الشمس لسه موجودة..لو ده حصل مش هيبقى عندى اى مشكلة
توم وجيرى
ساعات كتير بسأل نفسى هوا انا اللى بربى بنتى ولا هيا اللى بتربينى؟ يعنى انا بيبقى متهيألى انى بربيها رغم ان ممكن تكون الحقيقة غير كده خالص!! اصل انا عشان اقنع البنت المفعوصة دى بأى حاجة لازم الاول اشوف نفسى..ياترى انا كمان بعمل الحاجة اللى بطلبها منها دى؟؟ ولا لاء؟؟..واقولكوا على مثل بسيط..بنتى مثلا بتموت فى البيبسى رغم ان كل الناس متفقين على انه مضر جدا يمكن حتى شركة البيبسى نفسها!! والصراحة انا كمان مش بحبه اوى لكن ساعات بيجى لى مزاج اشربه..وف مرة من المرات مسكت كوباية وقعدت اشرب وطبعا هيا بتسالنى: بتشربى ايه يامامى؟؟..رديت عليها بثقة: بشرب شاى يا حبيبتى..طبعا هيا ماقتنعتش وسالتنى تانى: بس انتى مش بتحبى الشاى!! وكمان هوا الشاى مش بيبقى ساقع كده.؟؟.جاوبتها بنفس الثقة: وفيها ايه؟قمت من النوم لقيت نفسى بحب الشاى وبعدين مش ساقع ولا حاجة.. سالتنى لتالت مرة: طب ورينى كده..(ايه ده؟؟.. الواحد حاسس انه بيكلم وكيل نيابة.. ايه الخباثة دى؟؟ده احنا ماكناش اطفال !! ويعنى هوا عشان اشرب كوباية بيبسى مرة من نفسى لازم تعمل لى تحقيق!! اومال لو شافتنى باكل شيبسى بقى هتعمل فيا ايه؟)...طب هقولكوا على حاجة كمان..مرة ابن اختى شاف عمه وهوا بيدخن سيجارة..وقرب منه وساله بشغف: انت بتشرب سيجارة يا عموا؟؟..طبعا عموا اتكسف وقاله: معلش يا حبيبى انا عارف انه غلط
الولد ساله تانى: غلط ليه هيا السجارة وحشة؟ رد عليه : اه وحشة اوى لانها بتخلى الواحد يكح وبتوجع البطن كمان وانا مش هشربها تانى بعد كده..لكن الولد ساله تانى: ليه يا عموا دى حلوة اوى؟؟..عموا كده بقى اتنزنق ومش عارف يرد وفجأة جات ف باله فكرة ومسك موبايله وقعد يمثل انه بيتكلم ورسم على وشه الزعل وبعد ماقفل قرب من الولد وقاله: واحد صحبى مات..عارف مات ليه؟؟ الولد السوسة قاله: اكيد كان بيشرب سجاير!!طبعا انتوا كده فاكرين انه اقتنع بكلام عمه..لكن الولد القزعة بعد نص ساعة جاب ورقة ولفها وتخيل انه بيشرب سيجارة و قرب من عمه وقاله وهوا متقمص شخصية اللمبى: ممكن تولع لى يا عموا!! ومعنى كده ان الطفل مااقتنعش بالكلام خالص.. لان الطفل بيقلد كل حاجة وبيحكم بعينيه بس ولو فضل بقى عمه من هنا للصبح يقنعه مش هيقتنع !! اختى التانية مثلا عصبية اوى مع ولادها وطول النهار تزعق لهم لحد ماهما كمان بقوا نسخة منها ..ولما اشترت لهم ارنب يربوه ويلعبوا معاه مقدرش يستحمل عصبية ولادها وبعد حوالى ساعة لقت الارنب بيلطم على وشه وبقى عصبى زيهم بالضبط و بيوقع المية وبيطنطط.وبيصرخ!! يعنى الارنب اتاثر بسلوك الاطفال طب مابالكوا بالاطفال نفسهم بقى..انا درست فى دبلومة التربوى ان الطفل بيقلد كل حاجة بيشوفها.(بالمناسبة انا مااستفدتش اى حاجة من الدبلومة دى لانى اكتشفت ان الدراسة حاجة والواقع حاجة تانية خالص) واحنا عارفين ان مش كل تصرفاتنا صح بس هنعمل ايه؟ما احنا عايزين ولادنا يكونوا احسن مننا وعايزينهم ما يكرروش نفس اخطائنا وما يتعودوش على نفس الحاجات الغلط اللى احنا اتعودنا عليها..لكن فى نفس الوقت لازم نكون مقنعين وصادقين فى نصايحنا اصل ماينفعش انصحك بحاجة واعمل حاجة تانية خالص..(ايه التناقض ده)عشان كده قبل ما اطلب من بنتى تعمل حاجة او تبطل حاجة غلط لازم أنا كمان ابطل الحاجة دى واحب ابشركم ان من يوميها وانا بشرب اللبن كل يوم الصبح رغم انى مش بحبه (عشان الكالسيوم اللى فيه) ومابقتش بتفرج على توم وجيرى رغم انى بعشقه(عشان بيعلم العنف) وبقيت بنام من الساعة 8 مع الفراخ يعنى تضبطوا ساعتكم عليا(عشان عندى حضانة الصبح)!!!
الولد ساله تانى: غلط ليه هيا السجارة وحشة؟ رد عليه : اه وحشة اوى لانها بتخلى الواحد يكح وبتوجع البطن كمان وانا مش هشربها تانى بعد كده..لكن الولد ساله تانى: ليه يا عموا دى حلوة اوى؟؟..عموا كده بقى اتنزنق ومش عارف يرد وفجأة جات ف باله فكرة ومسك موبايله وقعد يمثل انه بيتكلم ورسم على وشه الزعل وبعد ماقفل قرب من الولد وقاله: واحد صحبى مات..عارف مات ليه؟؟ الولد السوسة قاله: اكيد كان بيشرب سجاير!!طبعا انتوا كده فاكرين انه اقتنع بكلام عمه..لكن الولد القزعة بعد نص ساعة جاب ورقة ولفها وتخيل انه بيشرب سيجارة و قرب من عمه وقاله وهوا متقمص شخصية اللمبى: ممكن تولع لى يا عموا!! ومعنى كده ان الطفل مااقتنعش بالكلام خالص.. لان الطفل بيقلد كل حاجة وبيحكم بعينيه بس ولو فضل بقى عمه من هنا للصبح يقنعه مش هيقتنع !! اختى التانية مثلا عصبية اوى مع ولادها وطول النهار تزعق لهم لحد ماهما كمان بقوا نسخة منها ..ولما اشترت لهم ارنب يربوه ويلعبوا معاه مقدرش يستحمل عصبية ولادها وبعد حوالى ساعة لقت الارنب بيلطم على وشه وبقى عصبى زيهم بالضبط و بيوقع المية وبيطنطط.وبيصرخ!! يعنى الارنب اتاثر بسلوك الاطفال طب مابالكوا بالاطفال نفسهم بقى..انا درست فى دبلومة التربوى ان الطفل بيقلد كل حاجة بيشوفها.(بالمناسبة انا مااستفدتش اى حاجة من الدبلومة دى لانى اكتشفت ان الدراسة حاجة والواقع حاجة تانية خالص) واحنا عارفين ان مش كل تصرفاتنا صح بس هنعمل ايه؟ما احنا عايزين ولادنا يكونوا احسن مننا وعايزينهم ما يكرروش نفس اخطائنا وما يتعودوش على نفس الحاجات الغلط اللى احنا اتعودنا عليها..لكن فى نفس الوقت لازم نكون مقنعين وصادقين فى نصايحنا اصل ماينفعش انصحك بحاجة واعمل حاجة تانية خالص..(ايه التناقض ده)عشان كده قبل ما اطلب من بنتى تعمل حاجة او تبطل حاجة غلط لازم أنا كمان ابطل الحاجة دى واحب ابشركم ان من يوميها وانا بشرب اللبن كل يوم الصبح رغم انى مش بحبه (عشان الكالسيوم اللى فيه) ومابقتش بتفرج على توم وجيرى رغم انى بعشقه(عشان بيعلم العنف) وبقيت بنام من الساعة 8 مع الفراخ يعنى تضبطوا ساعتكم عليا(عشان عندى حضانة الصبح)!!!
الخميس، 16 ديسمبر 2010
ريموت كنتروووول
يا سلام لو نحرك حياتنا كلها بالريموت كنترول وتبقى الحياة كلها على كيفنا وبمزاجنا.. يعنى تمسك الريموت فى ايدك وتقلب براحتك واللحظات الوحشة تجريها او تمسحها خالص ولحظات بقى الفرحة والنجاح تعيد وتزيد فيها او تعمل لهاpause اصل اوقات الواحد بيتمنى ان الزمن يقف عند اللحظة الحلوة ويفضل ثابت عندها يعنى يفضل شعورك بالفرحة والانبساط ويفضل الجو حواليك جميل وكله سعادة. لكن طبعا استحالة مااهى اصل الحياة فيها كل حاجة وماينفعش نحس بقيمة حاجة حلوة قبل مانجرب الوحشة الاول يعنى مش هنحس بقيمة صحتنا غير لو تعبنا شوية ولا بمتعة الراحة والكسل غير بعد شوية تعب ولا بحلاوة النجاح غير بعد الفشل ونفضل طول حياتنا بنتنقل من حالة لحالة يعنى شوية ربيع وشويتين خريف..ساعات شتا ومطر ورعد وساعات حر وصيف عشان كده ما ينفعش خالص نمسك ريموت ونحرك حياتنا اولا عشان حياتنا دى مش بايدنا احنا..دى بايد ربنا واحنا بس بنعمل اللى علينا وبنتحكم فى حاجات محددة..وثانيا لان الريموت لو كان فى ايدنا ماكناش هنستمتع باى حاجة لاننا ببساطة كنا هنفضل نقلب فى الاحداث كل شوية وف الاخر ماكناش هنستمتع بحاجة برضه
الأربعاء، 1 ديسمبر 2010
تفكير بصوت عالى
كل واحد مننا فيه حاجة شغلاه اوى..حاجة بيفكر فيها طول الوقت ..الحاجة دى ممكن اوى تكون امنية او حلم بيحلم بيه او تكون مشكلة بيفكر فيها وملهاش حل او امور يومية بتحصل فى حياته بتشغله او يكون بيحب حد وسرحان فيه. وماينفعش ان احنا نقلل من اهتمامات حد او نتريق عليه اصل كل واحد شايف ان اللى شاغل تفكيره مهم اوى بالنسبة له لان الموضوع نسبى..اوقات ابص على الناس واقول يا ترى كل واحد مشغول بايه دلوقتى؟؟واقول سبحان الله انت بس يارب اللى عارف كل واحد جواه ايه وبيفكر فى ايه؟؟ ومن نعمة ربنا علينا اننا بنفكر فى سرنا..يعنى تخيلوا لو اى حاجة بنفكر فيها بتظهر علينا من غير ما نقولها.. يعنى الست تسمع مراة ابنها وهيا بتقول( طبيخك وحش اوى يا حماتى) والراجل يسمع زميلته فى الشغل وهيا بتفكر وبتقول( يارب اتجوز بقى) والناس تسمع الست وهيا قاعدة فى العزومة وعاملة رقيقة وهيا من جواها بتقول (عايزة الورك يا فرغلى مابحبش الصدر)..وممكن كمان تلاقى واحد جاى يتخانق معاك من غير ما حضرتك تنطق اصلا ويجى يقولك: انا سامعك وانت بتفكر فيا وبتقول ان انا غبى.!! أو واحدة رذلة تقول لواحد: انا وحشة برضه؟ وهوا يرد عليها: مين قال كده ده انتى قمر..وهيا تتعصب عليه وتقوله: انا سامعة تفكيرك وعارفة انك شايفنى وحشة!! وساعتها ممكن يجوا يقبضوا على واحد كان بس بيفكر انه يسرق محفظة اللى جمبه..مجرد تفكير..وممكن مؤلف يرفع قضية على مؤلف تانى عشان سرق فكرته...ماأهوا التفكير ممكن يبقى جريمة بعد كده.!!.الصراحة كانت هتبقى فضيحة اصل ماينفعش كل اللى بنفكر فيه نقوله رغم ان ساعات تفكيرنا بيظهر فى كلامنا وساعات تانية بنظهر عكس اللى جوانا بالذات فى حالتين وهما(الحب) و(الكراهية) يعنى تبقى ياسمين بتموت فى وائل لكن تقوله : اهلا اهلا انت قلت لى اسمك ايه؟ وهيا فى سرها(وائل وائل) ويرد عليها وائل برقة:انا وائل.على فكرة لون فستانك يجنن وفى سره(وحش اوى الموف عليكى)..والست تقول لجوزها طلقنى طلقنى وفى سرها بتقول(ابوس ايدك اوعى تنطقها).. بتخيل واحد فى محل ذهب مع مراته وبيقولها :اختارى بقى الخاتم اللى نفسك فيه (وبيقول فى سره: يارب ما يعجبهاش حاجة عشان انا مفلس)..وهيا جمبه بتقوله :يا حبيبى انا مش عايزة انت عارف انا مابحبش الذهب.وبتقول فى سرها( انا نفسى اجيب الخاتم والاسورة كمان) والاستاذ اللى بيبيع بيقولهم : براحتكم المحل محلكم وعلى فكرة انا هكرمكم فى العمولة وبيقول فى سره( يارب مايشتروا دول شكلهم هيقرفونى وانا مش ناقص خسارة) وبنتهم زهقت من الوقفة وبتعيط: ياللا انا عايزة اعمل بيبى(وبتقول فى سرها عايزة اروح الملاهى بقى). ومامتها تقولها: امسكى نفسك شوية..وتسال البياع: مفيش تواليت هنا؟..وطبعا هيقفلها فى وشها: للاسف مفيش يا هانم.وجوزها اللى ما صدق هوا كمان بيقولها: ياللا نروح دلوقتى وهبقى اشترى لك الخاتم بعدين بدل البنت ماتفضحنا وتغرق الدنيا..ويا عينى الست مااشترتش الخاتم والراجل مادفعش حاجة والبياع ماخسرش والعفريتة الصغيرة نفذت (الفكرة) اللى كانت فى دماغها وراحت الملاهى...وعلى فكرة فيه ناس بتفهم اللى قدامها فعلا من غير ما يتكلم وبتقدر تقرأ افكاره و ساعات تانية الواحد بيفتكر انه فاهم اللى قدامه ومتاكد من تفكيره لكن بيتفاجىء بعد كده لما بيلاقيه مشغول بحاجة تانية خالص.. زى واحد كان ف عزاء والده قاعد حزين وسرحان وخايف.. واحد قرب منه وقعد يواسيه: اتطمن المرحوم والدك فى الجنة باذن الله..رد عليه: انا مش قلقان على والدى لكن انا قلقان على الزمالك هموت واعرف هوا عمل ايه فى ماتش النهاردة ربنا يرحمه يارب..ساله: تقصد والدك؟..قاله: لاء الزمالك!!
الجمعة، 26 نوفمبر 2010
عشان مامى تنام
زمان لما كنا اطفال كانوا بيحكوا لنا حواديت قبل النوم..وكنا اول ما نسمع كلمة(كان يا مكان...)نروح فى سابع نومة..ننام ونحلم كمان..دلوقتى البت اللى عندها تلات سنين عشان انيمها..لازم افضل اربع ساعات ع الاقل احكى فى حواديت...فضلت احكى لها فى حكاية الفراشة والاسد والنمر والعصفورة والقطة المشمشية....لقيتها بتضحك على كلامى وشوية ولقيتها صحصحت اكتر م الاول..البت دى مصفحة كده ليه..المهم اقتنعت ان ده مش زمن الفراشة والعصفورة..فقعدت احكى لها اخر فيلم شفته لاحمد حلمى فى السينما..وهيا عمالة تضحك..لالا ماينفعش احكى لها فيلم كوميدى..ده هيخليها تفوق زيادة..اسمعى يا بنتى..(وقررت احكى لها فيلم الهروب...اهوا فيلم حلو وكله عظة)..حسيت انها بدات تحس بالملل..احسن برضه..فيه امل انها تنام...وبعدين قلت احكى لها احسن فيلم الانس والجن عشان تترعب وتخاف وتحس على دمها وتنام بقى..(تقولوش البت دخلت فيلم لا انام !!).شوية وقالت لى: يا ماما ماانتى طول النهار بتكتبى فى حواديت..احكى لى اى حاجة منهم..(سوسة البت دى..احرجتنى..حسستنى بالمسئولية )..طيب يا بنت..هقولك اخر قصة كتبتها..واهوا حتى اعرف رايك فيها ...وقعدت احكى للبت يجى ربع ساعة وهيا منسجمة ع الاخر(ما انا موهوبة بقى ..اسلوبى خلاها هتموت م الضحك.ماشاء الله عليا)..المهم مابقاش فيه اى امل انها تنام ولا بعد عشر ساعات حتى..تقولش البت شاربة برميل قهوة..مفنجلة خالص(اكيد كلمة مفنجلة دى مستوحاة من ان اللى بيشرب القهوة فى فنجان بيصحصح ويفنجل ..دى وجهة نظرى يعنى)..المهم فضلت احكى برضه من غير ما احس باليأس..(الفاشل بس اللى بيياس لكن انا لسه ما فشلتش انا صحيح بقى لى خمس ساعات بحاول انيمها..بس هوا النوم بيجى فى لحظة.....الصبر....)..وقعدت اطبطب عليها شوية وازغد فى كتفها شوية.. (يا بت نامى بقى)..المهم بدات احس ان لسانى بدأ يتقل ..وعينى بدات تغمض شوية..مش عارفة مالى..ياريت يا زينة لو تغطينى يا حبيبتى..طبعا البنت ما صدقت وغطتنى حتى غطت دماغى (مع انها عارفة انى مش بحب اغطى راسى وانا نايمة بحس ان نفسى هيتكتم)..حاولت اطلع راسى من تحت اللحاف لكن مقدرتش..خلاص السهم نفد..والنوم غلبنى..مش بقولكوا النوم بيجى فى ثانية..!.وحسيت بالبت العفريتة نطت من فوق منى وطلعت تجرى عشان تشغل التليفزيون وتشوف والت ديزنى..ماشى يا زينة..خلى ميكى ماوس ينفعك..ياللا تصبحوا على خير..
واخيرا اتحجبت
قرار الحجاب من اصعب القرارات اللى البنت بتمر بيها فى حياتها..وهوا بالضبط زى قرار الجواز بالنسبة للراجل..اصل الراجل بيبقى اتعود على حياته كده من غير ست..عايش بحرية..اتعود على وحدته..ومريح دماغه من الالتزامات والعيال ومشاكلهم وبيكون صعب عليه انه يرتبط بواحدة..ممكن يكون من جواه بيتمنى يلاقى بنت الحلال لكن فى نفس الوقت فرحان بحياته كده ومتكيف عليها وخايف من خطوة الجواز..الحجاب للبنت كده بالضبط..اصلها اتعودت على شكلها وعلى تسريحة شعرها وستايل لبسها وخايفة بقى الحجاب يكبرها او يغير من ستايلها او خايفة تحس انها مابقتش حلوة وشيك زى الاول..ودى اصعب حاجة ممكن تحس بيها اى بنت بالذات قبل الجواز..عشان كده بتفضل تتهرب من القرار ده وبتحاول ماتفكرش فيه وبتقنع دايما نفسها انها مدام ملتزمة وبتصلى يبقى كده كفاية..انا عن نفسى طول عمرى بحلم بالحجاب ومع ذلك مااتحجبتش غير بعد ماتخرجت من الكلية..فجاة وبدون مقدمات..كنت رايحة مشوار وقررت انى عايزة البس الطرحة وانا نازلة.والصراحة فرحت اوى بالخطوة دى رغم ان فى الاول بتحسى بخوف شوية لاسباب كتير..بتخافى من رد فعل الناس..ياترى هيعجبهم شكلى كده ولا لاء؟ وبتبقى خايفة ترجعى فى كلامك وتخلعيه..اصلك ممكن تنزلى دلوقتى وتشوفى واحدة فاردة شعرها وتتغاظى وتقولى ايه بس اللى خلانى استعجل وتحسديها من جواكى رغم انها هيا اللى بتحسدك دلوقتى على قرارك ده ..بعد الحجاب كمان بتستغربى نفسك شوية. وبتحسى انك بدأتى تتعاملى مع انسانة تانية..اصل بعد الحجاب لازم شخصيتك تتغيروبتبقى خايفة ان دمك يبقى تقيل او تبقى معقدة لكن بالعكس لازم تفضلى محتفظة بروحك الحلوة وابتسامتك وشياكتك وهتلاقى اغلب اللى حواليكى بدأوا يتاثروا بيكى لانك ببساطة حبيتى حجابك وبالتالى قدرتى تخليهم هما كمان يحبوه زيك مااهوا اصلك لازم تتحجبى بحب ولازم تحسى انك سفيرة للحجاب وتحاولى تخلى كل اللى حواليكى معجبين بحجابك ويشوفوكى رمز للمحجبة اللذيذة العصرية الانيقة وفى نفس الوقت المحترمة البسيطة..وهتحسى انك نايمة وانتى مبسوطة ومتطمنة وحاسة انك اتقربتى من ربنا اوى وعملتى حاجة هيفرح بيها وهيكافئك عليها مانتى ليكى دعوة مستجابة اول ما بتنوى الحجاب لانك تعتبرى حديثة طاعة و تائبة وربنا اكيد هيكرمك..اصلك داريتى حاجة حلوة اوى ومش اى حاجة ده شعرك والشعر تاج المرأة لكن تخيلى انك داريتيها عشان خاطره هوا بس..شعور حلو اوى وممتع لانك بتحسى قد ايه انتى قوية لانك غطيتى شعرك عشان ترضيه ومااهتمتيش باى حد تانى..مش انتى لما بتحبى حد يتسمعى كلامه وبتحاولى تعملى الحاجات اللى تبسطه مابالك بقى بربنا لما يطلب مننا حاجة...انا اختى اتحجبت من حوالى سنة وكانت بتحب شعرها اوى وفعلا شعرها كانت الحاجات المميزة فيها والحقيقة هيا بتصلى وملتزمة لكن كان ناقصها بس الحجاب ومرة كانت راكبة العربية وبتكلم ربنا وبتبص للسما وبتقول يارب انا بحبك اوى بس مش قادرة اتحجب..مش قادرة..وسكتت..وبعد كده وقعت طوبة على العربية..مش عارفة الطوبة دى جت منين..بس قلبها اتقبض وحست ان ربنا مش راضى عنها وحاولت تنسى او تتناسى الموقف ده..وبعد حوالى اسبوع جوزها تعب اوى ودخل المستشفى وكانت منهارة ومرعوبة عليه وفى وسط حزنها وخوفها كلمت ربنا: يارب انت عملت كل ده عشان تخلينى اتحجب..خلاص يارب انا هتحجب ومش مهم بقى اى حاجة فى الدنيا..وبعد ماجوزها خرج من المستشفى اتحجبت وبقت زى القمر بالحجاب..يمكن بقت احلى من الاول وبقت بتهتم بتفاصيل لبسها واكسسوارها اكتر من الاول وبقت محجبة انيقة اوى..عشان كده مش لازم نستنى ابتلاء او غضب من ربنا..مش لازم نتحجب واحنا زعلانين اومضطرين او وسط ظروف وحشة او واحنا مكتئبين..ليه بنربط الحجاب بالاكتئاب؟؟ لازم نتحجب واحنا فرحانين وواثقين من نفسنا اوى لان الحجاب ده مجرد خطوة صح وهتجر وراها حاجات وقرارات صح كتيررررررر
الأربعاء، 24 نوفمبر 2010
سين سؤال
فيه ناس لما تيجى تكلمهم وتسالهم سؤال تلاقيهم بيردوا رد تانى خالص..كانهم ماسمعوش سؤالك او بيستعبطوا او عقلهم رايح لمكان تانى..يعنى تشوف الست تسالها: واخبارك ايه وعاملة ايه فى الشغل؟
ترد عليك: الاسعار بقت نار ايه ده الدنيا ولعت
تسالها تانى: ايه اخبار مامتك؟ صحتها عاملة ايه؟
ترد رد تانى خالص: عايزة اعمل ريجيم لبسى كله بقى ضيق عليا!!
والنوعية دى من الناس بتجاوب على اسئلة كان نفسها تتسالها ..يعنى هيا كان نفسها حد ياخد رايها فى موضوع الاسعار وموضوع الريجيم.ومدام شافتك قدامها هتتعامل معاك كانك خيال مآتة وتتخيل انك بتسالها الاسئلة اللى نفسها فيه كانها فى برنامج فى التليفزيون
فيه ناس بقى بيعلقوا ع الاسئلة..يعنى كل دقيقتين يسالوك نفس السؤال..مثلا اقابل واحدة صحبتى واسالها:ازيك يا حبيبتى..عاملة ايه؟
تسالنى:هتتغدى ايه النهاردة؟
ارد:صينية بطاطس باللحمة
تقولى:الله بحبها اوى..اخبار بناتك ايه؟
اجاوب:الحمد لله بقوا عفاريت خالص
تسالنى تانى:وانتى طابخة ايه النهاردة؟(لو ركزتوا هوا نفس السؤال بس باسلوب مختلف)
اجاوب تانى:قلت لك صينية بطاطس باللحمة
ترد ببرود:اه صح..واخبار اخواتك ايه؟
ارد عليها:بيسلموا عليكى اوى
ترد عليا:الله يسلمهم وهتتغدى ايه النهاردة
(واضح كده انها مدام كررت السؤال اكتر من مرة انها ناوية تيجى تتغدى عندى النهاردة)
فيه ناس تانية تلاقيهاعمالة تسال بسرعة مش بتاخد نفسها حتى وبحس كانى قدام وكيل نيابة وبيحقق معايا..مابلحقش افكر فى اجابة السؤال الاول الاقيها نقلت على السؤال التانى..
فيه ناس بقى انتى بتردى عليهم قبل ما يسالوا..اصل النوعية دى بتبقى مش مركزة شويتين..يعنى تشوفك وتبقى عايزة تسالك لكن ماتعرفش..
اول مااشوفها تقولى: اهلا وحشتينى .انتى ....انتى....
ارد عليها بسرعة: انا كويسة الحمد لله وانتى عاملة ايه فى الشغل؟
ترد عليا: انا الحمد لله..اخبار ...الصغيرة..الصغيرة دى؟
الحقها بسرعة: اه بنتى الصغيرة كويسة والله
تسالنى تانى: ووو و....وووو
ارد بسرعة: اخواتى ..؟اه كويسين برضه وجوزى بيسلم عليكى بالمرة ماانتى اكيد هتسالى عليه..
(على فكرة النوعية دى بترهقنى اوى اصلهم يفضلوا يبصوا لك وساكتين والمفروض انت اللى تقوم بالدورين ..يعنى تسال وتجاوب على نفسك..بس النوع ده بيكون صعب اوى فى التليفون لانك مابتفهمش سؤاله الا بعد ماتكون خلصت رصيدك كله عشان كده المفروض تقول من نفسك كل الاسئلة المتوقعة من الاول وتجاوب عليها بسرعة وتنجز.)
لكن النوعية بقى اللى بتخنقنى..هيا النوعية اللى بتسالنى وبتبقى مركزة ومصحصحة اوى فى السؤال..لكن ساعة الاجابة تسرح خالص. لانها ولا فارق معاها اصلا..يعنى تسالنى السؤال وتسرح وتسيبنى اجاوب انا براحتى واكلم نفسى
مرة واحدة قالت لى: سمعت انك هتولدى قريب..انتى فى الشهر الكام؟
ارد عليها: انا فى اول التاسع بس تعبانة اوى وعايزة اولد بقى وارتاح ..انتى عملتى ايه لما ولدتى بنتك. ولدتيها اول التاسع ولا فى نصه؟
ترد عليا وهيا بتبص فى ناحية تانية خالص: ولا يهمك يا قمر..ماتخافيش..ايه رايك فى موبايلى الجديد..يجنن مش كده..طب بصى هرد على التليفون ده ..اه صحيح اخبار مامتك ايه .احكى لى احكى لى..(هيا عايزانى افضل احكى وارغى رغم انها بترد ع التليفون ومشغولة..بس تقريبا عايزة تحس ان فيه خلفية او فيه موسيقى تصويرية وهيا بتتكلم)..وفيه بقى نوعية من الناس بتسال وتجاوب على نفسها يعنى تقولك ايه ده انتى تخنتى اوى.ليه كده؟ اه اكيد من قعدة البيت وعيالك اخبارهم ايه؟ اكيد مدوخينك طبعا مااهى العيال كلها بقت كده..( الصراحة النوعية دى مريحة اوى..مش ببذل اى جهد فى الاجابة و بحس انها فهمانى وعارفانى اكتر من نفسى والله)
فيه ناس بقى بتسالك اسئلة مش متوقعة..بتفاجئك ..بتحس من اسئلتها انها ماينفعش تكون صحبتك..يعنى اول ماتشوفك تسالك: انتى هتتجوزى امتى؟؟
هيا طبعا مش فاكرة انها حضرت فرحك ومش فاكرة انها جابت لك هدية لما ولدتى..ويظهر انها مش فاكرة اصلا انتى مين؟؟معرفش بقى زهايمر ده ولا قلة اصل ولا غباوة.. وانتى بتردى عليها بكل برود: مش عارفة..!!
تسالك تانى: هتتجوزى امتى يا بنتى؟
تحاولى تهزرى: والله ما خدنهاش دى فى المدرسة..
(صحبتى دى بحس دايما وانا بكلمها انى بتكلم مع واحدة فاقدة الذاكرة او واحدة نايمة على روحها.بحس وانا بكلمها ان انا مش انا.!! بس لازم ارش عليها لتر ونص مية معدنية..او اضربها بحاجة على دماغها..وبعدها بتتعدل على طول الصراحة)
ترد عليك: الاسعار بقت نار ايه ده الدنيا ولعت
تسالها تانى: ايه اخبار مامتك؟ صحتها عاملة ايه؟
ترد رد تانى خالص: عايزة اعمل ريجيم لبسى كله بقى ضيق عليا!!
والنوعية دى من الناس بتجاوب على اسئلة كان نفسها تتسالها ..يعنى هيا كان نفسها حد ياخد رايها فى موضوع الاسعار وموضوع الريجيم.ومدام شافتك قدامها هتتعامل معاك كانك خيال مآتة وتتخيل انك بتسالها الاسئلة اللى نفسها فيه كانها فى برنامج فى التليفزيون
فيه ناس بقى بيعلقوا ع الاسئلة..يعنى كل دقيقتين يسالوك نفس السؤال..مثلا اقابل واحدة صحبتى واسالها:ازيك يا حبيبتى..عاملة ايه؟
تسالنى:هتتغدى ايه النهاردة؟
ارد:صينية بطاطس باللحمة
تقولى:الله بحبها اوى..اخبار بناتك ايه؟
اجاوب:الحمد لله بقوا عفاريت خالص
تسالنى تانى:وانتى طابخة ايه النهاردة؟(لو ركزتوا هوا نفس السؤال بس باسلوب مختلف)
اجاوب تانى:قلت لك صينية بطاطس باللحمة
ترد ببرود:اه صح..واخبار اخواتك ايه؟
ارد عليها:بيسلموا عليكى اوى
ترد عليا:الله يسلمهم وهتتغدى ايه النهاردة
(واضح كده انها مدام كررت السؤال اكتر من مرة انها ناوية تيجى تتغدى عندى النهاردة)
فيه ناس تانية تلاقيهاعمالة تسال بسرعة مش بتاخد نفسها حتى وبحس كانى قدام وكيل نيابة وبيحقق معايا..مابلحقش افكر فى اجابة السؤال الاول الاقيها نقلت على السؤال التانى..
فيه ناس بقى انتى بتردى عليهم قبل ما يسالوا..اصل النوعية دى بتبقى مش مركزة شويتين..يعنى تشوفك وتبقى عايزة تسالك لكن ماتعرفش..
اول مااشوفها تقولى: اهلا وحشتينى .انتى ....انتى....
ارد عليها بسرعة: انا كويسة الحمد لله وانتى عاملة ايه فى الشغل؟
ترد عليا: انا الحمد لله..اخبار ...الصغيرة..الصغيرة دى؟
الحقها بسرعة: اه بنتى الصغيرة كويسة والله
تسالنى تانى: ووو و....وووو
ارد بسرعة: اخواتى ..؟اه كويسين برضه وجوزى بيسلم عليكى بالمرة ماانتى اكيد هتسالى عليه..
(على فكرة النوعية دى بترهقنى اوى اصلهم يفضلوا يبصوا لك وساكتين والمفروض انت اللى تقوم بالدورين ..يعنى تسال وتجاوب على نفسك..بس النوع ده بيكون صعب اوى فى التليفون لانك مابتفهمش سؤاله الا بعد ماتكون خلصت رصيدك كله عشان كده المفروض تقول من نفسك كل الاسئلة المتوقعة من الاول وتجاوب عليها بسرعة وتنجز.)
لكن النوعية بقى اللى بتخنقنى..هيا النوعية اللى بتسالنى وبتبقى مركزة ومصحصحة اوى فى السؤال..لكن ساعة الاجابة تسرح خالص. لانها ولا فارق معاها اصلا..يعنى تسالنى السؤال وتسرح وتسيبنى اجاوب انا براحتى واكلم نفسى
مرة واحدة قالت لى: سمعت انك هتولدى قريب..انتى فى الشهر الكام؟
ارد عليها: انا فى اول التاسع بس تعبانة اوى وعايزة اولد بقى وارتاح ..انتى عملتى ايه لما ولدتى بنتك. ولدتيها اول التاسع ولا فى نصه؟
ترد عليا وهيا بتبص فى ناحية تانية خالص: ولا يهمك يا قمر..ماتخافيش..ايه رايك فى موبايلى الجديد..يجنن مش كده..طب بصى هرد على التليفون ده ..اه صحيح اخبار مامتك ايه .احكى لى احكى لى..(هيا عايزانى افضل احكى وارغى رغم انها بترد ع التليفون ومشغولة..بس تقريبا عايزة تحس ان فيه خلفية او فيه موسيقى تصويرية وهيا بتتكلم)..وفيه بقى نوعية من الناس بتسال وتجاوب على نفسها يعنى تقولك ايه ده انتى تخنتى اوى.ليه كده؟ اه اكيد من قعدة البيت وعيالك اخبارهم ايه؟ اكيد مدوخينك طبعا مااهى العيال كلها بقت كده..( الصراحة النوعية دى مريحة اوى..مش ببذل اى جهد فى الاجابة و بحس انها فهمانى وعارفانى اكتر من نفسى والله)
فيه ناس بقى بتسالك اسئلة مش متوقعة..بتفاجئك ..بتحس من اسئلتها انها ماينفعش تكون صحبتك..يعنى اول ماتشوفك تسالك: انتى هتتجوزى امتى؟؟
هيا طبعا مش فاكرة انها حضرت فرحك ومش فاكرة انها جابت لك هدية لما ولدتى..ويظهر انها مش فاكرة اصلا انتى مين؟؟معرفش بقى زهايمر ده ولا قلة اصل ولا غباوة.. وانتى بتردى عليها بكل برود: مش عارفة..!!
تسالك تانى: هتتجوزى امتى يا بنتى؟
تحاولى تهزرى: والله ما خدنهاش دى فى المدرسة..
(صحبتى دى بحس دايما وانا بكلمها انى بتكلم مع واحدة فاقدة الذاكرة او واحدة نايمة على روحها.بحس وانا بكلمها ان انا مش انا.!! بس لازم ارش عليها لتر ونص مية معدنية..او اضربها بحاجة على دماغها..وبعدها بتتعدل على طول الصراحة)
الأحد، 21 نوفمبر 2010
عايزة اشترى هدية
عايزة اشترى هدية لجوزى بمناسبة الفالنتين مع انى عارفة انه مش هيجيب لى حاجة لانه مش بيعترف بالمناسبة دى..يعنى لا هوا عيد اضحى ولا عيد فطر ولا عاشورا..هيبجيب هدية ليه بقى؟؟بس على فكرة اللى بيشترى الهدية بيستمتع اكتر من اللى بياخدها..اصلك بتشتريها وبتتخيل شكل اللى هياخدها وهوا فرحان ده لو عجبته يعنى... والمفروض دلوقتى انى مستمتعة وانا دايخة من الصبح وعمالة الف وطالع عينى والدنيا كمان شكلها هتشتى عليا وهتغرقنى مية والبرق والرعد هيشتغل دلوقتى عشان تكتمل الرومانسية..لازم انجز كده واشترى اى حاجة..اصل انا مش غاوية اوى موضوع الهدايا ده..انا شايفة انى لو اشتريت برفان هتبقى هدية تقليدية اوى وقديمة اوى..انا بقول اشترى لبس احسن..ممكن اجيب له بيجامة كستور مخططة.بس دى لازم اجيبها واجيب معاها مضاد حيوى. اصلها ماتعملش حاجة فى السقعة دى..وانا اصلا مش هعرف لانى مااعرفش مقاسه ومابعرفش اشترى لبس لحد..ده انا مش بعرف اشترى لبس لبنتى الصغيرة الا لو كانت معايا مابالكوا بجوزى بقى..طيب خلينا فى الهدايا العملية يعنى امواس حلاقة-ملمع احذية-جوز شارابات(.رومانسية ..رومانسية)..المفروض الواحد يكون رومانسى فى يوم مبروك زى ده..اه عرفت ..كانت غايبة عنى فين دى؟؟..اشترى شوز..ولا بلاش احسن بدل ما يلبسها ممكن يستخدمها استخدام تانى..خلاص انا ممكن العب دلوقتى فى الهدايا الرمزية..يعنى كارت بسيط عليه قلب احمر..او جراب موبايل او فرشة شعر..اهى حاجات رمزية وظريفة..لا لا..انا بقول اشترى وردة وخلاص بس الرجالة مش بتفهم اوى فى موضوع الورد وهيقولى كنتى اشتريتى قرنبيطة افيد..اصل جوزى بيعشق القرنبيط.!!...واللهى انا اكرم لى انى احترم نفسى وارجع بيتنا بلا فالنتين بلا هدايا ..وعشان كمان الحق اوضب البيت و اغسل المواعين وانشر الغسيل وبعد كده اشيله من ع الحبل قبل الدنيا ما تشتى واكوى له هدومه وارتبها واحطها فى الدولاب واطبخ واوضب المطبخ واجهز الغدا واعمل له الاكل اللى بيحبه.وممكن كمان احط له شمع ع السفرة ده غير انى مش هنسى اعمل الرز بلبن اللى بيموت فيه...متهيالى ان ده احلى احتفال بالفالنتين...ده غير انى كده ابقى قدمت له عشرين هدية مش هدية واحدة..يارب يطمر بس
الأربعاء، 10 نوفمبر 2010
اهوا تغيير
الحياة بقت مملة..الايام شكل بعضها..الناس بتتكلم فى نفس المواضيع..لازم شوية تغيير..اهم حاجة التغيير...تغيير فى كل حاجة..اول مااتجوزت كنت كل شوية اغير حاجة فى الشقة..البرواز ده مكانه بايخ هنا..ادخله الليفينج رووم يكون شكله اظرف..والكنبة دى دمها تقيل اوى هنا..لو زحزحتها شوية يمكن الاودة تبقى اوسع..و.مرة جوزى دخل البيت وصرخ..الحقونا ..السفرة اتسرقت....اصلى كنت مغيرة مكانها..انا كمان بحب اغير فى شكلى كل فترة..ساعات اقص شعرى وساعات اسيبه طويل..ساعات اصبغه وساعات اسيبه..ستايل لبسى كل فترة بحب اغيره ومش بيكون قصدى اغيره بس غصب عنى الاقى نفسى بقيت بحب ستايل تانى ..فى الاكل كمان مرات اعلق على نوع اكل لغاية ما ازهق واحب نوع تانى ..والاغانى كمان افضل اسمعها لغاية مااكرهها واقلب على غنوة تانية..واحب السفر عشان اغير جو ومناظر..طبيعة شخصيتى ملولة وبكره الروتين..ومااحبش كل حاجة تكون على وتيرة واحدة..كل فترة كمان اغير من نوعية الكتب اللى بقراها وبحاول اغير من شخصيتى ومن الحاجات اللى مابحبهاش فى نفسى..عندى جارة ليها وجهة نظر فى التغيير بتقولى لازم كل فترة تغيرى الجزار اللى بتتعاملى معاه عشان مايضحكش عليكى ويسرقك ويديكى لحمة اى كلام.(وجهة نظر برضه تحترم)..اختى بقى لها وجهة نظر تانية بتقولى..مش اى تغيير مايمكن يكون تغيير للاسوأ..بس ملحوظة..اختى دى عدوة التغيير مش بتحب تغير فى شكلها خالص ولا فى بيتها ولا حتى موبايلها مش بتغيره غير لما بيجيب اخره ويقولها.(ابوس ايدك هاتى واحد جديد بقى وارحمينى)
بس انا مش بحب التغيير بس من اجل التغيير..لاء انا بحب اجدد للاحسن..مع ان مش شرط..اصل ممكن اكون دلوقتى شايفة الحاجة دى كويسة وبعد فترة احب اغيرها واستغرب ازاى انا كنت مقتنعة بيها فى وقت م الاوقات واسال نفسى ايه كان عاجبنى فيها؟؟انا حاليا ناوية اغير المكوجى اللى بتعامل معاه(دى خطتى الجاية فى التغيير)..
بس انا مش بحب التغيير بس من اجل التغيير..لاء انا بحب اجدد للاحسن..مع ان مش شرط..اصل ممكن اكون دلوقتى شايفة الحاجة دى كويسة وبعد فترة احب اغيرها واستغرب ازاى انا كنت مقتنعة بيها فى وقت م الاوقات واسال نفسى ايه كان عاجبنى فيها؟؟انا حاليا ناوية اغير المكوجى اللى بتعامل معاه(دى خطتى الجاية فى التغيير)..
الثلاثاء، 9 نوفمبر 2010
كلام عيال
هوا فيه احلى من العيال وكلامهم..ده انا هعمل لهم قاموس قريب..عشان لما احب اتعامل معاهم.دى العيال اصلا بقت لمضة لماضة..لا وبقوا بيفهموا فى كل حاجة..وبيحبوا يتحشروا فى اللى مالهمش فيه..الولد محمد ابن اختى لاقيته داخل فى نص الكلام وانا بحكى لمامته حاجة..وتقريبا الواد جاله احساس بانى غبية اوما بفهمش .فقالى:هوا انتى مخك مش شغال؟؟.والتانى يقولى:خلى بالك م العلامة؟..المهم. اعرفكم بقى على اطفال العيلة..هشام مثلا او سرحان عبد البصير طول النهار سرحان وبيحب على روحه كل مايشوف بنت يحبها..(الحاج متولى الصغير) يقول لمامته :بصى انا هتجوز اتنين..ماتقوليش واحدة بس..
وطبعا جالى باعتبارى حماته المستقبلية: انا هتجوز زينة وفرح بناتك..وهديكى جنيه..ايه رايك..؟هتجوزهم هما التلاتة..
قلت له:والله عرض مغرى طب سيبنى افكر شوية..وبعدين هما اتنين مش تلاتة..(اصل هشام عنده مشكلة مع رقم تلاتة.).زينة بنتى بقى دى شرسه شوية شبه زينة كده صحبه هركليز..وساعات بتبقى رومانسية جات تقولى وهيا فرحانة:هشام عايز يتجوزنى..يعنى انا عروسة وهيشيلنى هوبا..(هوا ده مفهومها عن الجواز انه يشيلها هوبا)..الطفل الاكبر بقى..محمد..او عدو المرأة يقولى:انا لما اكبر هخلف تلات ولاد..انا مابحبش البنات..بيزهقونى..مابحبش لعب البنات ولالبس البنات ولا دلع البنات..بكرهم بكرهم..سلمى بقى دى رقيقة اوى..طيبة كده ومسالمة..وفى حالها..باباها واخوها الاتنين عايزين يلعبوامعاها كوتشينة.قالت لباباها:انت بتلعب احسن من محمد بس هلعب معاه عشان مايزعلش..وراحت قالت لاخوها:انا بقوله بس كده عشان ما يتسلطش انت عارف بابا..البت سلمى دى مية مية..بتعرف تمشى امورها..حنين بقى..عصبية كده وعسل..لما تتنرفز على زينة تقولها:يا قحيرة يا قحيرة(تقصد حقيرة)..وياسلام لما هيا وزينة بيتقابلوا..يا نهار عض..الجيران كلهم بيجوا يسلكوا..والصراحة بحكم عشرتى للاطفال الامامير الحلوي الطيبين..احب اقولكوا ان من الكلام الشائع عندهم..كلمة بتاعتى..هيا تقوله:العروسة دى بتاعتى
وهوا يقول:والعربية دى مش بتاعة بابى على فكرة دى بتاعتى انا(الواد هيورث ابوه بالحيا)
والخناقة تزيد وتوصل لتيتة..زينة تقول:تيتة دى بتاعتى
هشام يرد:لاء تيتة دى بتاعتى انا
فترد عليه:طيب مامى دى بتاعتى
يرد:طيب مامتك دى خالتى
وهنا بقى تشتد الخناقة ويشدوا فى شعر بعض ويصرخواولازم البيت كله يهديهم..صلوا ع النبى..الامور ماتتحلش كده ياجماعة..
انا بقى حبيت افرحهم.فقلت لهم:عارفين تيتة بتعملكوا ايه فى المطبخ دلوقتى؟
رد محمد:بتعمل تورتة
قلت له:عرفت ازاى
رد بكل ثقة:اصلى بدأت اذاكر..عشان دماغى تبقى نظيفة..
طيب هيا التورتة دى فى انهى درس يعنى عايزة اعرف..
العيال دى بتسرح بيا ولا ايه؟؟والله حلال فيهم برامج الاطفال المتخلفة اللى بتيجى فى التليفزيون دى..انا بنت خالتى بقى لما بتزعق لابنها بتاخد الوضوع جد اوى..مرة سمعتها بتقوله لما وقع الكوباية ع الارض:انت مدرك خطورة اللى انت عملته؟؟
والله كلام كبير اوى..دى لو قالت الكلمتين دول لجوزها مش هيفهمهم..ومش بعيد يسيب لها البيت ويمشى..مابالك بالطفل البرىء ده..عن اذنكم بقى عشان الحق انقذ حنين من تحت ايد زينة
وطبعا جالى باعتبارى حماته المستقبلية: انا هتجوز زينة وفرح بناتك..وهديكى جنيه..ايه رايك..؟هتجوزهم هما التلاتة..
قلت له:والله عرض مغرى طب سيبنى افكر شوية..وبعدين هما اتنين مش تلاتة..(اصل هشام عنده مشكلة مع رقم تلاتة.).زينة بنتى بقى دى شرسه شوية شبه زينة كده صحبه هركليز..وساعات بتبقى رومانسية جات تقولى وهيا فرحانة:هشام عايز يتجوزنى..يعنى انا عروسة وهيشيلنى هوبا..(هوا ده مفهومها عن الجواز انه يشيلها هوبا)..الطفل الاكبر بقى..محمد..او عدو المرأة يقولى:انا لما اكبر هخلف تلات ولاد..انا مابحبش البنات..بيزهقونى..مابحبش لعب البنات ولالبس البنات ولا دلع البنات..بكرهم بكرهم..سلمى بقى دى رقيقة اوى..طيبة كده ومسالمة..وفى حالها..باباها واخوها الاتنين عايزين يلعبوامعاها كوتشينة.قالت لباباها:انت بتلعب احسن من محمد بس هلعب معاه عشان مايزعلش..وراحت قالت لاخوها:انا بقوله بس كده عشان ما يتسلطش انت عارف بابا..البت سلمى دى مية مية..بتعرف تمشى امورها..حنين بقى..عصبية كده وعسل..لما تتنرفز على زينة تقولها:يا قحيرة يا قحيرة(تقصد حقيرة)..وياسلام لما هيا وزينة بيتقابلوا..يا نهار عض..الجيران كلهم بيجوا يسلكوا..والصراحة بحكم عشرتى للاطفال الامامير الحلوي الطيبين..احب اقولكوا ان من الكلام الشائع عندهم..كلمة بتاعتى..هيا تقوله:العروسة دى بتاعتى
وهوا يقول:والعربية دى مش بتاعة بابى على فكرة دى بتاعتى انا(الواد هيورث ابوه بالحيا)
والخناقة تزيد وتوصل لتيتة..زينة تقول:تيتة دى بتاعتى
هشام يرد:لاء تيتة دى بتاعتى انا
فترد عليه:طيب مامى دى بتاعتى
يرد:طيب مامتك دى خالتى
وهنا بقى تشتد الخناقة ويشدوا فى شعر بعض ويصرخواولازم البيت كله يهديهم..صلوا ع النبى..الامور ماتتحلش كده ياجماعة..
انا بقى حبيت افرحهم.فقلت لهم:عارفين تيتة بتعملكوا ايه فى المطبخ دلوقتى؟
رد محمد:بتعمل تورتة
قلت له:عرفت ازاى
رد بكل ثقة:اصلى بدأت اذاكر..عشان دماغى تبقى نظيفة..
طيب هيا التورتة دى فى انهى درس يعنى عايزة اعرف..
العيال دى بتسرح بيا ولا ايه؟؟والله حلال فيهم برامج الاطفال المتخلفة اللى بتيجى فى التليفزيون دى..انا بنت خالتى بقى لما بتزعق لابنها بتاخد الوضوع جد اوى..مرة سمعتها بتقوله لما وقع الكوباية ع الارض:انت مدرك خطورة اللى انت عملته؟؟
والله كلام كبير اوى..دى لو قالت الكلمتين دول لجوزها مش هيفهمهم..ومش بعيد يسيب لها البيت ويمشى..مابالك بالطفل البرىء ده..عن اذنكم بقى عشان الحق انقذ حنين من تحت ايد زينة
ابقوا افتكرونى
اهم حاجة فى حياة اى حد هيا ذكرياته...الذكريات دى عمر تانى للانسان...انت ممكن تعيش بس على الذكريات..السواح لما بيجوا مصر لازم ياخدوا اى حاجة تذكار عشان يفتكروا المكان...وانا دايما بحب يكون ليه فى اى مناسبة تذكار...حتى لو كان التذكار اغنية..ساعات بسمع اغنية معينة افتكر يوم معين او فترة معينة من حياتى...وساعات اشوف صورة افتكر فترة معينة..وكل صورة غالبا بيكون ليها قصة...حتى االرسايل اللى على الموبايل مش بحب امسحها بالذات الرسايل الحلوة لازم احتفظ بيها..ويمكن مش برضى اغير موبايلى مخصوص عشان بخاف الرسايل تتمسح وببقى قهرانة وانا شايفاها بتضيع..تصدقوا كمان انى بحب الاغانى اللى بتتكلم عن الموضوع ده يعنى بعشق اغنية فكرونى لام كلثوم واغنية وافتكرت لحماقى...انا كمان من النوع لما افتكر موقف معين بلاقى نفسى فاكراه بالضبط ده حتى بفتكر يومها كان يوم ايه وكنت لابسة ايه ...وفيه اماكن بتفكرنى باشخاص معينين...بالذات لو الاشخاص دول مابقوش موجودين خلاص فى حياتى...بس اكتر مكان بحبه وبحب اعدى جمبه..هوا الكلية بتاعتى...على طول لما اعدى افتكر موقف ..وكل مرة افتكر موقف مختلف...وكل موقف من دول مااقدرش انساااااااااااااااااه ..والناس فى حياتك 5 انواع..فيه نوع على طول فاكرك وانت دايما على باله والنوع ده فاكرك سواء انت معاه او بعيد عنه لانه ميقدرش مابيفكرش فيك(.اوعى تكون انت بقى اللى مش فاكره)..وفيه نوع مش فاكرك وناسيك خالص وانت اصلا ولا بتيجى على باله(اوعى تكون بتفكر فيه .ده مايستاهلش اصلا)..ونوع تالت انت فاكره مش فاكرك ومطنشك لكن هوا العكس ده يمكن اكتر واحد مشغول بيك وباحوالك بس بيظهر العكس( اعمل مطنشه زى ماهوا عامل مطنشك).فيه نوع رابع بيكون معاك وقريب منك وتفتكر انه فاكرك ومهتم بيك لكن هوا بعد واحد عنك وانت اخر شخص بتيجى على باله(سيبه لما يفتكر لوحده).فيه نوع خامس بقى بيفتكرك فى مواسم معينة..يعنى يفتكرك وهوا تعبان او زهقان او وهوا فرحان.او مايفكرش فيك الا لو محتاج منك حاجة(ما تفكرش فيه اوى لانه نوع بتاع مصلحته ولما مصلحته هتخلص مش هتشوف وشه الا لو عنده مصلحة جديدة)..بس اهم حاجة ان احنا نفضل فاكرين حبايبنا والناس المهمة فى حياتنا لانهم هما اللى عاملين لحياتنا اهمية. وكمان ماننساش اللى ساعدنا او اللى وقف جمبنا او اللى تعب اوى عشان يسعدنا ويشوف ضحكة فى وشنا...فيه مقوله بتقول وكيف انساه وسياتى من يذكرنى به فى يوم ما....سلام بقى وابقوا افتكرونى...
اسئلة طفلة
قربت منى وسالتنى ببراءة: ليه اتجوزتى بابى؟؟..رديت عليها: عشان بحبه..سالتنى تانى: طيب ليه هوا بقى اتجوزك؟؟..رديت عليها تانى: عشان بيحبنى...سالتنى: يعنى هوا اختارك انتى بالذات ليه؟؟..جاوبتها: عشان بيحبنى...سالتنى : طيب ليه خلفتونى؟؟..قلت له وانا بضحك: عشان بنحبك؟؟ سالت: ليه اخترتى لى الاسم ده بالذات؟؟ رديت عليها: عشان بحبه....سالتنى: ليه بابى بيجيب لى لبس كتيرر؟؟ جاوبتها: عشان بيحبك..سالتنى من جديد: طب ليه ساعات مش بتجيبوا لى الشيبسى اللى بحبه؟؟..جاوبتها من جديد: عشان بنحبك...حسيت انها مااقتنعتش وسمعتها بتقول لنفسها( ازاى حد يحب حد ويحرمه من حاجة بيحبها؟؟)..رديت فى سرى برضه(عشان خايف عليه من الحاجة دى لانها ممكن تضره)...فكرت شوية وبعدين سالتنى: ليه ربنا خلقنا؟؟..جاوبتها: عشان بيحبنا..سالتنى تانى: طب ليه ربنا خلق لنا الورد والاشجار والمطر والحاجات الحلوة دى؟؟..جاوبتها بسرعة: عشان بيحبنا.سالتنى:ليه انتى وبابى بتصلوا وبتدعوا ربنا؟؟..جاوبتها: عشان بنحبه. فكرت وبعد شوية سالت: ليه مامة صحبتى ماتت يا مامى؟؟..فكرت شوية وقلت لها: اكيد عشان ربنا بيحبها..وسمعتها بتقول(ازاى بيحبها وتموت وتسيب بنتها لوحدها؟؟)..طبطبت على كتفها وقلت لها: عشان مامتها طيبة وربنا اختارها تكون جمبه ..عارفة ليه ربنا اختارها؟؟.(بابى اختار مامى ومامى اختارت لى اسمى).ردت بسرعة وقالت ببراءة وايمان : اكيد اختارهاعشان بيحبها...
الاثنين، 4 أكتوبر 2010
بنتى مش شبهى
ماشاء الله تبارك الله اول ما النونو يتولد تلاقى الف عين وعين بتبص عليه وتلاقى الناس كلها قبل ما يقولوا ليك مبروك يسالوكى هوا النونو شبه مين؟؟
طبعا الاب يرد بفخر شديد: شبهى طبعا الولد لابوه..والام ترد فى غيظ: لاء طبعا هوا انت حلو كده
ويفضلوا بقى فى المناقشة العقيمة دى مدة طويلة..مرة سمعت اتنين بيتخانقوا هيا تقوله شبه بابى وهوا يقولها لاء شبه مامى وفى الاخر اكتشفوا انه مش ابنهم اصلا.. وكل ده عشان احنا من جوانا انانين شوية وعايزين ولادنا يكونوا نسخة مننا لكن ده ما ينفعش طبعا لان من الاخر مفيش حد شبه حد..نفسى بصراحة نبطل العادة السيئة دى..مع انى بصراحة برضه زعلت لما لقيت بنتى مش شبهى خالص ولا كانى انا امها..يعنى تعبت فيها تسع تشهر وولدتها وبعد كل ده مش شبهى..بس الحقيقة انابصيت للموضوع من ناحيه ايجابية يعنى انا فعلا نفسى بنتى ما تبقاش شبهى فى اى حاجة..عايزاها تكون مستقلة فى كل حاجة..يعنى شخصيتها مستقلة وشكلها مختلف واهتماماتها مختلفة..عايزاها بس تاخد منى روحى وخفة دمى ونفسى كمان الاقيها تقرا وتكتب زيى ويا سلام لو تدخل نفس الكلية اللى انا دخلتها واتمنى الحقيقة انها تتاثر بيا فى طريقة لبسى وطريقة كلامى ويا ريت يا ريت بجد لو تكون طيبة ومحترمة كده زيى وتكون شخصيتها قوية وفى نفس الوقت عندها احساس بالناس وعندها ذوق كده زيى..يعنى دى بس الحاجات اللى اتمنى انها تاخدها منى..حاجات بسيطة خالص مش كده؟؟
طبعا الاب يرد بفخر شديد: شبهى طبعا الولد لابوه..والام ترد فى غيظ: لاء طبعا هوا انت حلو كده
ويفضلوا بقى فى المناقشة العقيمة دى مدة طويلة..مرة سمعت اتنين بيتخانقوا هيا تقوله شبه بابى وهوا يقولها لاء شبه مامى وفى الاخر اكتشفوا انه مش ابنهم اصلا.. وكل ده عشان احنا من جوانا انانين شوية وعايزين ولادنا يكونوا نسخة مننا لكن ده ما ينفعش طبعا لان من الاخر مفيش حد شبه حد..نفسى بصراحة نبطل العادة السيئة دى..مع انى بصراحة برضه زعلت لما لقيت بنتى مش شبهى خالص ولا كانى انا امها..يعنى تعبت فيها تسع تشهر وولدتها وبعد كل ده مش شبهى..بس الحقيقة انابصيت للموضوع من ناحيه ايجابية يعنى انا فعلا نفسى بنتى ما تبقاش شبهى فى اى حاجة..عايزاها تكون مستقلة فى كل حاجة..يعنى شخصيتها مستقلة وشكلها مختلف واهتماماتها مختلفة..عايزاها بس تاخد منى روحى وخفة دمى ونفسى كمان الاقيها تقرا وتكتب زيى ويا سلام لو تدخل نفس الكلية اللى انا دخلتها واتمنى الحقيقة انها تتاثر بيا فى طريقة لبسى وطريقة كلامى ويا ريت يا ريت بجد لو تكون طيبة ومحترمة كده زيى وتكون شخصيتها قوية وفى نفس الوقت عندها احساس بالناس وعندها ذوق كده زيى..يعنى دى بس الحاجات اللى اتمنى انها تاخدها منى..حاجات بسيطة خالص مش كده؟؟
الاشتراك في:
الرسائل (Atom)