الجمعة، 26 نوفمبر 2010

عشان مامى تنام

زمان لما كنا اطفال كانوا بيحكوا لنا حواديت قبل النوم..وكنا اول ما نسمع كلمة(كان يا مكان...)نروح فى سابع نومة..ننام ونحلم كمان..دلوقتى البت اللى عندها تلات سنين عشان انيمها..لازم افضل اربع ساعات ع الاقل احكى فى حواديت...فضلت احكى لها فى حكاية الفراشة والاسد والنمر والعصفورة والقطة المشمشية....لقيتها بتضحك على كلامى وشوية ولقيتها صحصحت اكتر م الاول..البت دى مصفحة كده ليه..المهم اقتنعت ان ده مش زمن الفراشة والعصفورة..فقعدت احكى لها اخر فيلم شفته لاحمد حلمى فى السينما..وهيا عمالة تضحك..لالا ماينفعش احكى لها فيلم كوميدى..ده هيخليها تفوق زيادة..اسمعى يا بنتى..(وقررت احكى لها فيلم الهروب...اهوا فيلم حلو وكله عظة)..حسيت انها بدات تحس بالملل..احسن برضه..فيه امل انها تنام...وبعدين قلت احكى لها احسن فيلم الانس والجن عشان تترعب وتخاف  وتحس على دمها وتنام بقى..(تقولوش البت دخلت فيلم لا انام !!).شوية وقالت لى: يا ماما ماانتى طول النهار بتكتبى فى حواديت..احكى لى اى حاجة منهم..(سوسة البت دى..احرجتنى..حسستنى بالمسئولية )..طيب يا بنت..هقولك اخر قصة كتبتها..واهوا حتى اعرف رايك فيها ...وقعدت احكى للبت يجى ربع ساعة وهيا منسجمة ع الاخر(ما انا موهوبة بقى ..اسلوبى خلاها هتموت م الضحك.ماشاء الله عليا)..المهم مابقاش فيه اى امل انها تنام ولا بعد عشر ساعات حتى..تقولش البت شاربة برميل قهوة..مفنجلة خالص(اكيد كلمة مفنجلة دى مستوحاة من ان اللى بيشرب القهوة فى فنجان بيصحصح ويفنجل ..دى وجهة نظرى يعنى)..المهم فضلت احكى برضه من غير ما احس باليأس..(الفاشل بس اللى بيياس لكن انا لسه ما فشلتش انا صحيح بقى لى خمس ساعات بحاول انيمها..بس هوا النوم بيجى فى لحظة.....الصبر....)..وقعدت اطبطب عليها شوية وازغد فى كتفها شوية.. (يا بت نامى بقى)..المهم بدات احس ان لسانى بدأ يتقل ..وعينى بدات تغمض شوية..مش عارفة مالى..ياريت يا زينة لو تغطينى يا حبيبتى..طبعا البنت ما صدقت وغطتنى حتى غطت دماغى (مع انها عارفة انى مش بحب اغطى راسى وانا نايمة بحس ان نفسى هيتكتم)..حاولت اطلع راسى من تحت اللحاف لكن مقدرتش..خلاص السهم نفد..والنوم غلبنى..مش بقولكوا النوم بيجى فى ثانية..!.وحسيت بالبت العفريتة نطت من فوق منى وطلعت تجرى عشان تشغل التليفزيون وتشوف والت ديزنى..ماشى يا زينة..خلى  ميكى ماوس ينفعك..ياللا تصبحوا على خير..

واخيرا اتحجبت

قرار الحجاب من اصعب القرارات اللى البنت بتمر بيها فى حياتها..وهوا بالضبط زى قرار الجواز بالنسبة للراجل..اصل الراجل بيبقى اتعود على حياته كده من غير ست..عايش بحرية..اتعود على وحدته..ومريح دماغه من الالتزامات والعيال ومشاكلهم وبيكون صعب عليه انه يرتبط بواحدة..ممكن يكون من جواه بيتمنى يلاقى بنت الحلال لكن فى نفس الوقت فرحان بحياته كده ومتكيف عليها وخايف من خطوة الجواز..الحجاب للبنت كده بالضبط..اصلها اتعودت على شكلها  وعلى تسريحة شعرها وستايل لبسها وخايفة بقى الحجاب يكبرها او يغير من ستايلها او خايفة تحس انها مابقتش حلوة وشيك زى الاول..ودى اصعب حاجة ممكن تحس بيها اى بنت بالذات قبل الجواز..عشان كده بتفضل تتهرب من القرار ده وبتحاول ماتفكرش فيه وبتقنع دايما نفسها انها مدام ملتزمة وبتصلى يبقى كده كفاية..انا عن نفسى طول عمرى بحلم بالحجاب ومع ذلك مااتحجبتش غير بعد ماتخرجت من الكلية..فجاة وبدون مقدمات..كنت رايحة مشوار وقررت انى عايزة البس الطرحة وانا نازلة.والصراحة فرحت اوى بالخطوة دى رغم ان فى الاول بتحسى بخوف شوية لاسباب كتير..بتخافى من رد فعل الناس..ياترى هيعجبهم شكلى كده ولا لاء؟ وبتبقى خايفة ترجعى فى كلامك وتخلعيه..اصلك ممكن تنزلى دلوقتى وتشوفى واحدة فاردة شعرها وتتغاظى وتقولى ايه بس اللى خلانى استعجل وتحسديها من جواكى رغم انها هيا اللى بتحسدك دلوقتى على قرارك ده ..بعد الحجاب كمان بتستغربى نفسك شوية. وبتحسى انك بدأتى تتعاملى مع انسانة تانية..اصل بعد الحجاب لازم شخصيتك تتغيروبتبقى خايفة ان دمك يبقى تقيل او تبقى معقدة لكن بالعكس لازم تفضلى محتفظة بروحك الحلوة وابتسامتك وشياكتك وهتلاقى اغلب اللى حواليكى بدأوا يتاثروا بيكى  لانك ببساطة حبيتى حجابك وبالتالى قدرتى تخليهم هما كمان يحبوه زيك مااهوا اصلك لازم تتحجبى بحب ولازم تحسى انك سفيرة للحجاب وتحاولى تخلى كل اللى حواليكى معجبين بحجابك ويشوفوكى رمز للمحجبة اللذيذة العصرية الانيقة وفى نفس الوقت المحترمة البسيطة..وهتحسى انك نايمة وانتى مبسوطة ومتطمنة وحاسة انك اتقربتى من ربنا اوى وعملتى حاجة هيفرح بيها وهيكافئك عليها مانتى ليكى دعوة مستجابة اول ما بتنوى الحجاب لانك تعتبرى حديثة طاعة و تائبة وربنا اكيد هيكرمك..اصلك داريتى حاجة حلوة اوى ومش اى حاجة ده شعرك والشعر تاج المرأة لكن تخيلى انك داريتيها عشان خاطره هوا بس..شعور حلو اوى وممتع لانك بتحسى قد ايه انتى قوية لانك غطيتى شعرك عشان ترضيه ومااهتمتيش باى حد تانى..مش انتى لما بتحبى حد يتسمعى كلامه وبتحاولى تعملى الحاجات اللى تبسطه مابالك بقى بربنا لما يطلب مننا حاجة...انا اختى اتحجبت من حوالى سنة وكانت بتحب شعرها اوى وفعلا شعرها كانت الحاجات المميزة فيها والحقيقة هيا بتصلى وملتزمة لكن كان ناقصها بس الحجاب ومرة كانت راكبة العربية وبتكلم ربنا وبتبص للسما وبتقول يارب انا بحبك اوى بس مش قادرة اتحجب..مش قادرة..وسكتت..وبعد كده وقعت طوبة على العربية..مش عارفة الطوبة دى جت منين..بس قلبها اتقبض وحست ان ربنا مش راضى عنها وحاولت تنسى او تتناسى الموقف ده..وبعد حوالى اسبوع جوزها تعب اوى ودخل المستشفى وكانت منهارة ومرعوبة عليه وفى وسط حزنها وخوفها كلمت ربنا: يارب انت عملت كل ده عشان تخلينى اتحجب..خلاص يارب انا هتحجب ومش مهم بقى اى حاجة فى الدنيا..وبعد ماجوزها خرج من المستشفى اتحجبت وبقت زى القمر بالحجاب..يمكن بقت احلى من الاول وبقت بتهتم بتفاصيل لبسها واكسسوارها اكتر من الاول وبقت محجبة انيقة اوى..عشان كده مش لازم نستنى ابتلاء او غضب من ربنا..مش لازم نتحجب واحنا زعلانين اومضطرين او وسط ظروف وحشة او واحنا مكتئبين..ليه بنربط الحجاب بالاكتئاب؟؟ لازم نتحجب واحنا فرحانين وواثقين من نفسنا اوى لان الحجاب ده مجرد خطوة صح وهتجر وراها حاجات وقرارات صح كتيررررررر

الأربعاء، 24 نوفمبر 2010

سين سؤال

فيه ناس لما تيجى تكلمهم وتسالهم سؤال تلاقيهم بيردوا رد تانى خالص..كانهم ماسمعوش سؤالك او بيستعبطوا او عقلهم رايح لمكان تانى..يعنى تشوف الست تسالها: واخبارك ايه وعاملة ايه فى الشغل؟
ترد عليك: الاسعار بقت نار ايه ده الدنيا ولعت
تسالها تانى: ايه اخبار مامتك؟ صحتها عاملة ايه؟
ترد رد تانى خالص: عايزة اعمل ريجيم لبسى كله بقى ضيق عليا!!
والنوعية دى من الناس بتجاوب على اسئلة كان نفسها تتسالها ..يعنى هيا كان نفسها حد ياخد رايها فى موضوع الاسعار وموضوع الريجيم.ومدام شافتك قدامها هتتعامل معاك كانك خيال مآتة وتتخيل انك بتسالها الاسئلة اللى نفسها فيه كانها فى برنامج فى التليفزيون
فيه ناس بقى بيعلقوا ع الاسئلة..يعنى كل دقيقتين يسالوك نفس السؤال..مثلا اقابل واحدة صحبتى واسالها:ازيك يا حبيبتى..عاملة ايه؟
تسالنى:هتتغدى ايه النهاردة؟
ارد:صينية بطاطس باللحمة
تقولى:الله بحبها اوى..اخبار بناتك ايه؟
اجاوب:الحمد لله بقوا عفاريت خالص
تسالنى تانى:وانتى طابخة ايه النهاردة؟(لو ركزتوا هوا نفس السؤال بس باسلوب مختلف)
اجاوب تانى:قلت لك صينية بطاطس باللحمة
ترد ببرود:اه صح..واخبار اخواتك ايه؟
ارد عليها:بيسلموا عليكى اوى
ترد عليا:الله يسلمهم وهتتغدى ايه النهاردة
(واضح كده انها مدام كررت السؤال اكتر من مرة انها ناوية تيجى تتغدى عندى النهاردة)
فيه ناس تانية تلاقيهاعمالة تسال بسرعة مش بتاخد نفسها حتى وبحس كانى قدام وكيل نيابة وبيحقق معايا..مابلحقش افكر فى اجابة السؤال الاول الاقيها نقلت على السؤال التانى..
فيه ناس بقى انتى بتردى عليهم قبل ما يسالوا..اصل النوعية دى بتبقى مش مركزة شويتين..يعنى تشوفك وتبقى عايزة تسالك لكن ماتعرفش..
اول مااشوفها تقولى: اهلا وحشتينى .انتى ....انتى....
ارد عليها بسرعة: انا كويسة الحمد لله وانتى عاملة ايه فى الشغل؟
ترد عليا: انا الحمد لله..اخبار ...الصغيرة..الصغيرة دى؟
الحقها بسرعة: اه بنتى الصغيرة كويسة والله
تسالنى تانى: ووو و....وووو
ارد بسرعة: اخواتى ..؟اه كويسين برضه وجوزى بيسلم عليكى بالمرة ماانتى اكيد هتسالى عليه..
(على فكرة النوعية دى بترهقنى اوى اصلهم يفضلوا يبصوا لك وساكتين والمفروض انت اللى تقوم بالدورين ..يعنى تسال وتجاوب على نفسك..بس النوع ده بيكون صعب اوى فى التليفون لانك مابتفهمش سؤاله الا بعد ماتكون خلصت رصيدك كله عشان كده المفروض تقول من نفسك كل الاسئلة المتوقعة من الاول وتجاوب عليها بسرعة وتنجز.)
لكن النوعية بقى اللى بتخنقنى..هيا النوعية اللى بتسالنى وبتبقى مركزة ومصحصحة اوى فى السؤال..لكن ساعة الاجابة تسرح خالص. لانها ولا فارق معاها اصلا..يعنى تسالنى السؤال وتسرح وتسيبنى اجاوب انا براحتى واكلم نفسى
مرة واحدة قالت لى: سمعت انك هتولدى قريب..انتى فى الشهر الكام؟
ارد عليها: انا فى اول التاسع بس  تعبانة اوى وعايزة اولد بقى وارتاح ..انتى عملتى ايه لما ولدتى بنتك. ولدتيها اول التاسع ولا فى نصه؟
ترد عليا وهيا بتبص فى ناحية تانية خالص: ولا يهمك يا قمر..ماتخافيش..ايه رايك فى موبايلى الجديد..يجنن مش كده..طب بصى هرد على التليفون ده ..اه صحيح اخبار مامتك ايه .احكى لى احكى لى..(هيا عايزانى افضل احكى وارغى  رغم انها بترد ع التليفون ومشغولة..بس تقريبا عايزة تحس ان فيه خلفية او فيه موسيقى تصويرية وهيا بتتكلم)..وفيه بقى نوعية من الناس بتسال وتجاوب على نفسها يعنى تقولك ايه ده انتى تخنتى اوى.ليه كده؟ اه اكيد من قعدة البيت وعيالك اخبارهم ايه؟ اكيد مدوخينك طبعا مااهى العيال كلها بقت كده..( الصراحة النوعية دى مريحة اوى..مش ببذل اى جهد فى الاجابة و بحس انها فهمانى وعارفانى اكتر من نفسى والله)
فيه ناس بقى بتسالك اسئلة مش متوقعة..بتفاجئك ..بتحس من اسئلتها انها ماينفعش تكون صحبتك..يعنى اول ماتشوفك تسالك: انتى هتتجوزى امتى؟؟
هيا طبعا مش فاكرة انها حضرت فرحك ومش فاكرة انها جابت لك هدية لما ولدتى..ويظهر انها مش فاكرة اصلا انتى مين؟؟معرفش بقى زهايمر ده ولا قلة اصل ولا غباوة.. وانتى بتردى عليها بكل برود: مش عارفة..!!
تسالك تانى: هتتجوزى امتى يا بنتى؟
تحاولى تهزرى: والله ما خدنهاش دى فى المدرسة..
(صحبتى دى بحس دايما وانا بكلمها انى بتكلم مع واحدة فاقدة الذاكرة او واحدة نايمة على روحها.بحس وانا بكلمها ان انا مش انا.!! بس لازم ارش عليها لتر ونص مية معدنية..او اضربها بحاجة على دماغها..وبعدها بتتعدل على طول الصراحة) 

الأحد، 21 نوفمبر 2010

عايزة اشترى هدية

عايزة اشترى هدية لجوزى بمناسبة الفالنتين مع انى عارفة انه مش هيجيب لى حاجة لانه مش بيعترف بالمناسبة دى..يعنى لا هوا عيد اضحى ولا عيد فطر ولا عاشورا..هيبجيب هدية ليه بقى؟؟بس على فكرة اللى بيشترى الهدية بيستمتع اكتر من اللى بياخدها..اصلك بتشتريها وبتتخيل شكل اللى هياخدها وهوا فرحان ده لو عجبته يعنى... والمفروض دلوقتى انى مستمتعة وانا دايخة من الصبح وعمالة الف وطالع عينى والدنيا كمان شكلها هتشتى عليا وهتغرقنى مية والبرق والرعد هيشتغل دلوقتى عشان تكتمل الرومانسية..لازم انجز كده واشترى اى حاجة..اصل انا مش غاوية اوى موضوع الهدايا ده..انا شايفة انى لو اشتريت برفان هتبقى هدية تقليدية اوى وقديمة اوى..انا بقول اشترى لبس احسن..ممكن اجيب له بيجامة كستور مخططة.بس دى لازم اجيبها واجيب معاها مضاد حيوى. اصلها ماتعملش حاجة فى السقعة دى..وانا اصلا مش هعرف لانى مااعرفش مقاسه ومابعرفش اشترى لبس لحد..ده انا مش بعرف اشترى لبس لبنتى الصغيرة الا لو كانت معايا مابالكوا بجوزى بقى..طيب خلينا فى الهدايا العملية يعنى امواس حلاقة-ملمع احذية-جوز شارابات(.رومانسية ..رومانسية)..المفروض الواحد يكون رومانسى فى يوم مبروك زى ده..اه عرفت ..كانت غايبة عنى فين دى؟؟..اشترى شوز..ولا بلاش احسن بدل ما يلبسها ممكن يستخدمها استخدام تانى..خلاص انا ممكن العب دلوقتى فى الهدايا الرمزية..يعنى كارت بسيط عليه قلب احمر..او جراب موبايل او فرشة شعر..اهى حاجات رمزية وظريفة..لا لا..انا بقول اشترى وردة وخلاص بس الرجالة مش بتفهم اوى فى موضوع الورد  وهيقولى كنتى اشتريتى  قرنبيطة افيد..اصل جوزى بيعشق القرنبيط.!!...واللهى انا اكرم لى انى احترم نفسى وارجع بيتنا  بلا فالنتين بلا هدايا ..وعشان كمان الحق اوضب البيت و اغسل المواعين وانشر الغسيل وبعد كده اشيله من ع الحبل قبل الدنيا ما تشتى واكوى له هدومه  وارتبها واحطها فى الدولاب واطبخ واوضب المطبخ واجهز الغدا واعمل له الاكل اللى بيحبه.وممكن كمان احط له شمع ع السفرة  ده غير انى مش هنسى اعمل الرز بلبن اللى بيموت فيه...متهيالى ان ده احلى احتفال بالفالنتين...ده غير انى  كده ابقى قدمت له عشرين هدية مش هدية واحدة..يارب يطمر بس

الأربعاء، 10 نوفمبر 2010

اهوا تغيير

الحياة بقت مملة..الايام شكل بعضها..الناس بتتكلم فى نفس المواضيع..لازم شوية تغيير..اهم حاجة التغيير...تغيير فى كل حاجة..اول مااتجوزت كنت كل شوية اغير حاجة فى الشقة..البرواز ده مكانه بايخ هنا..ادخله الليفينج رووم يكون شكله اظرف..والكنبة دى دمها تقيل اوى هنا..لو زحزحتها شوية يمكن الاودة تبقى اوسع..و.مرة جوزى دخل البيت وصرخ..الحقونا ..السفرة اتسرقت....اصلى كنت مغيرة مكانها..انا كمان بحب اغير فى شكلى كل فترة..ساعات اقص شعرى وساعات اسيبه طويل..ساعات اصبغه وساعات اسيبه..ستايل لبسى كل فترة بحب اغيره ومش بيكون قصدى اغيره بس غصب عنى الاقى نفسى بقيت بحب ستايل تانى ..فى الاكل كمان مرات اعلق على نوع اكل لغاية ما ازهق واحب نوع تانى ..والاغانى كمان افضل اسمعها لغاية مااكرهها واقلب على غنوة تانية..واحب السفر عشان اغير جو ومناظر..طبيعة شخصيتى ملولة وبكره الروتين..ومااحبش كل حاجة تكون على وتيرة واحدة..كل فترة كمان اغير من نوعية الكتب اللى بقراها وبحاول اغير من شخصيتى ومن الحاجات اللى مابحبهاش فى نفسى..عندى جارة ليها وجهة نظر فى التغيير بتقولى لازم كل فترة تغيرى الجزار اللى بتتعاملى معاه عشان مايضحكش عليكى ويسرقك ويديكى لحمة اى كلام.(وجهة نظر برضه تحترم)..اختى بقى لها وجهة نظر تانية بتقولى..مش اى تغيير مايمكن يكون تغيير للاسوأ..بس ملحوظة..اختى دى عدوة التغيير مش بتحب تغير فى شكلها خالص ولا فى بيتها ولا حتى موبايلها مش بتغيره غير لما بيجيب اخره ويقولها.(ابوس ايدك هاتى واحد جديد بقى وارحمينى)
بس انا مش بحب التغيير بس من اجل التغيير..لاء انا بحب اجدد للاحسن..مع ان مش شرط..اصل ممكن اكون دلوقتى شايفة الحاجة دى كويسة وبعد فترة احب اغيرها واستغرب ازاى انا كنت مقتنعة بيها فى وقت م الاوقات واسال نفسى ايه كان عاجبنى فيها؟؟انا حاليا ناوية اغير المكوجى اللى بتعامل معاه(دى خطتى الجاية فى التغيير)..

الثلاثاء، 9 نوفمبر 2010

كلام عيال

هوا فيه احلى من العيال وكلامهم..ده انا هعمل لهم قاموس قريب..عشان لما احب اتعامل معاهم.دى العيال اصلا بقت لمضة لماضة..لا وبقوا بيفهموا فى كل حاجة..وبيحبوا يتحشروا فى اللى مالهمش فيه..الولد محمد ابن اختى لاقيته داخل فى نص الكلام وانا بحكى لمامته حاجة..وتقريبا الواد جاله احساس بانى غبية اوما بفهمش .فقالى:هوا انتى مخك مش شغال؟؟.والتانى يقولى:خلى بالك م العلامة؟..المهم. اعرفكم بقى على اطفال العيلة..هشام مثلا او سرحان عبد البصير طول النهار سرحان وبيحب على روحه كل مايشوف بنت يحبها..(الحاج متولى الصغير) يقول لمامته :بصى انا هتجوز اتنين..ماتقوليش واحدة بس..
وطبعا جالى باعتبارى حماته المستقبلية: انا هتجوز زينة وفرح بناتك..وهديكى جنيه..ايه رايك..؟هتجوزهم هما التلاتة..
قلت له:والله عرض مغرى طب سيبنى افكر شوية..وبعدين هما اتنين مش تلاتة..(اصل هشام عنده مشكلة مع رقم تلاتة.).زينة بنتى بقى دى شرسه شوية شبه زينة كده صحبه هركليز..وساعات بتبقى رومانسية جات تقولى وهيا فرحانة:هشام عايز يتجوزنى..يعنى انا عروسة وهيشيلنى هوبا..(هوا ده مفهومها عن الجواز انه يشيلها هوبا)..الطفل الاكبر بقى..محمد..او عدو المرأة يقولى:انا لما اكبر هخلف تلات ولاد..انا مابحبش البنات..بيزهقونى..مابحبش لعب البنات ولالبس البنات ولا دلع البنات..بكرهم بكرهم..سلمى بقى دى رقيقة اوى..طيبة كده ومسالمة..وفى حالها..باباها واخوها الاتنين عايزين يلعبوامعاها كوتشينة.قالت لباباها:انت بتلعب احسن من محمد بس هلعب معاه عشان مايزعلش..وراحت قالت لاخوها:انا بقوله بس كده عشان ما يتسلطش انت عارف بابا..البت سلمى دى مية مية..بتعرف تمشى امورها..حنين بقى..عصبية كده وعسل..لما تتنرفز على زينة تقولها:يا قحيرة يا قحيرة(تقصد حقيرة)..وياسلام لما هيا وزينة بيتقابلوا..يا نهار عض..الجيران كلهم بيجوا يسلكوا..والصراحة بحكم عشرتى للاطفال الامامير الحلوي الطيبين..احب اقولكوا ان من الكلام الشائع عندهم..كلمة بتاعتى..هيا تقوله:العروسة دى بتاعتى
وهوا يقول:والعربية دى مش بتاعة بابى على فكرة دى بتاعتى انا(الواد هيورث ابوه بالحيا)
والخناقة تزيد وتوصل لتيتة..زينة تقول:تيتة دى بتاعتى
هشام يرد:لاء تيتة دى بتاعتى انا
فترد عليه:طيب مامى دى بتاعتى
يرد:طيب مامتك دى خالتى
وهنا بقى تشتد الخناقة ويشدوا فى شعر بعض ويصرخواولازم البيت كله يهديهم..صلوا ع النبى..الامور ماتتحلش كده ياجماعة..
انا بقى حبيت افرحهم.فقلت لهم:عارفين تيتة بتعملكوا ايه فى المطبخ دلوقتى؟
رد محمد:بتعمل تورتة
قلت له:عرفت ازاى
رد بكل ثقة:اصلى بدأت اذاكر..عشان دماغى تبقى نظيفة..
طيب هيا التورتة دى فى انهى درس يعنى عايزة اعرف..
العيال دى بتسرح بيا ولا ايه؟؟والله حلال فيهم برامج الاطفال المتخلفة اللى بتيجى فى التليفزيون دى..انا بنت خالتى بقى لما بتزعق لابنها بتاخد الوضوع جد اوى..مرة سمعتها بتقوله لما وقع الكوباية ع الارض:انت مدرك خطورة اللى انت عملته؟؟
والله كلام كبير اوى..دى لو قالت الكلمتين دول لجوزها مش هيفهمهم..ومش بعيد يسيب لها البيت ويمشى..مابالك بالطفل البرىء ده..عن اذنكم بقى عشان الحق انقذ حنين من تحت ايد زينة

ابقوا افتكرونى

اهم حاجة فى حياة اى حد هيا ذكرياته...الذكريات دى عمر تانى للانسان...انت ممكن تعيش بس على الذكريات..السواح لما بيجوا مصر لازم ياخدوا اى حاجة تذكار عشان يفتكروا المكان...وانا دايما بحب يكون ليه فى اى مناسبة تذكار...حتى لو كان التذكار اغنية..ساعات بسمع اغنية معينة افتكر يوم معين او فترة معينة من حياتى...وساعات اشوف صورة افتكر فترة معينة..وكل صورة غالبا بيكون ليها قصة...حتى االرسايل اللى على الموبايل مش بحب امسحها بالذات الرسايل الحلوة لازم احتفظ بيها..ويمكن مش برضى اغير موبايلى مخصوص عشان بخاف الرسايل تتمسح وببقى قهرانة وانا شايفاها بتضيع..تصدقوا كمان انى بحب الاغانى اللى بتتكلم عن الموضوع ده يعنى بعشق اغنية فكرونى لام كلثوم واغنية وافتكرت لحماقى...انا كمان من النوع لما افتكر موقف معين بلاقى نفسى فاكراه بالضبط ده حتى بفتكر يومها كان يوم ايه وكنت لابسة ايه ...وفيه اماكن بتفكرنى باشخاص معينين...بالذات لو الاشخاص دول مابقوش موجودين خلاص فى حياتى...بس اكتر مكان بحبه وبحب اعدى جمبه..هوا الكلية بتاعتى...على طول لما اعدى افتكر موقف ..وكل مرة افتكر موقف مختلف...وكل موقف من دول مااقدرش انساااااااااااااااااه ..والناس فى حياتك 5 انواع..فيه نوع على طول فاكرك وانت دايما على باله والنوع ده فاكرك سواء انت معاه او بعيد عنه لانه ميقدرش مابيفكرش فيك(.اوعى تكون انت بقى اللى مش فاكره)..وفيه نوع مش فاكرك وناسيك خالص وانت اصلا ولا بتيجى على باله(اوعى تكون بتفكر فيه .ده مايستاهلش اصلا)..ونوع تالت انت فاكره مش فاكرك ومطنشك لكن هوا العكس ده يمكن اكتر واحد مشغول بيك وباحوالك بس بيظهر العكس( اعمل مطنشه زى ماهوا عامل مطنشك).فيه نوع رابع بيكون معاك وقريب منك وتفتكر انه فاكرك ومهتم بيك لكن هوا بعد واحد عنك وانت اخر شخص بتيجى على باله(سيبه لما يفتكر لوحده).فيه نوع خامس بقى بيفتكرك فى مواسم معينة..يعنى يفتكرك وهوا تعبان او زهقان او وهوا فرحان.او مايفكرش فيك الا لو محتاج منك حاجة(ما تفكرش فيه اوى لانه نوع بتاع مصلحته ولما مصلحته هتخلص مش هتشوف وشه الا لو عنده مصلحة جديدة)..بس اهم حاجة ان احنا نفضل فاكرين حبايبنا والناس المهمة فى حياتنا لانهم هما اللى عاملين لحياتنا اهمية. وكمان ماننساش اللى ساعدنا او اللى وقف جمبنا او اللى تعب اوى عشان يسعدنا ويشوف ضحكة فى وشنا...فيه مقوله بتقول وكيف انساه وسياتى من يذكرنى به فى يوم ما....سلام بقى وابقوا افتكرونى...

اسئلة طفلة

 قربت منى وسالتنى ببراءة: ليه اتجوزتى بابى؟؟..رديت عليها: عشان بحبه..سالتنى تانى: طيب ليه هوا بقى اتجوزك؟؟..رديت عليها تانى: عشان بيحبنى...سالتنى: يعنى هوا اختارك انتى بالذات ليه؟؟..جاوبتها: عشان بيحبنى...سالتنى : طيب ليه خلفتونى؟؟..قلت له وانا بضحك: عشان بنحبك؟؟ سالت: ليه اخترتى لى الاسم ده بالذات؟؟ رديت عليها: عشان بحبه....سالتنى: ليه بابى بيجيب لى لبس كتيرر؟؟ جاوبتها: عشان بيحبك..سالتنى من جديد: طب ليه ساعات مش بتجيبوا لى الشيبسى اللى بحبه؟؟..جاوبتها من جديد: عشان بنحبك...حسيت انها مااقتنعتش وسمعتها بتقول لنفسها( ازاى حد يحب حد ويحرمه من حاجة بيحبها؟؟)..رديت فى سرى برضه(عشان خايف عليه من الحاجة دى لانها ممكن تضره)...فكرت شوية وبعدين سالتنى: ليه ربنا خلقنا؟؟..جاوبتها: عشان بيحبنا..سالتنى تانى: طب ليه ربنا خلق لنا الورد والاشجار والمطر والحاجات الحلوة دى؟؟..جاوبتها بسرعة: عشان بيحبنا.سالتنى:ليه انتى وبابى بتصلوا وبتدعوا ربنا؟؟..جاوبتها: عشان بنحبه. فكرت وبعد شوية سالت: ليه مامة صحبتى ماتت يا مامى؟؟..فكرت شوية وقلت لها: اكيد عشان ربنا بيحبها..وسمعتها بتقول(ازاى  بيحبها وتموت وتسيب بنتها لوحدها؟؟)..طبطبت على كتفها وقلت لها: عشان مامتها طيبة وربنا  اختارها تكون جمبه ..عارفة ليه ربنا اختارها؟؟.(بابى اختار مامى ومامى اختارت لى اسمى).ردت بسرعة وقالت ببراءة وايمان :  اكيد اختارهاعشان بيحبها...