الجمعة، 21 يناير 2011

عروسة من غير عريس

كنت معزومة على خطوبة واحدة معرفهاش اوى الصراحة بس قلت اروح عشان اجامل وابارك وعشان ماما كانت عايزة تاخدنى معاها (تقريبا عايزة حد يسليها فى السكة) المهم رحنا بيت العروسة(بيت باباها يعنى) عشان هيا اصلا خطوبة عائلية..والعروسة كانت زى العسل واللهى..امورة وشيك وعسل وقاعدة تضحك زى الهبلة..انا بدأت اقلق هوا العريس اتاخر ليه يا جماعة؟؟ المواصلات برضه؟؟ معلش الغايب حجته معاه..!!بس غريبة اوى العروسة بتضحك وفرحانة(شكلها فرحانة انه مجاش يمكن تكون مامتها غصباها ع الخطوبة ولا حاجة..ع العموم وانا مالى)...ماما اتنرفزت منى: وانتى مالك ماتخليكى فى حالك..بطلى رغى شوية يا مملة..(الله يسامحك ياماما الحق عليا انى جيت معاكى ..هيا دى اخرتها)..المهم بعد حوالى ساعة لقيت ابو العريس(الغايب) هوا اللى بيلبس العروسة الشبكة...(يمكن العريس بيتكسف ولا حاجة)..هوا العريس فين ياجدعان؟؟هوا عنده شغل ولا حاجة؟؟يمكن عنده اجتماع مهم او معرفش ياخد اجازة النهاردة.او يمكن تقلان ع العروسة (بيدبح لها القطة من اولها جدع برافو عليه)..ماما زغدتنى فى رجلى: اخرسى شوية..اخر مرة اخدك معايا فى حتة...(مش عارفة  ليه حسيت من تهديد ماما انى انا لسه طفلة وانها مش هتجيب لى حاجة حلوة)..المهم فيه واحدة ظريفة قربت منى وقالت لى وهيا فرحانة اوى: بصى انا ارتحت لك وهقولك (هوا سر شويبس ولا ايه)..رسمت ضحكة وقلت لها: اتفضلى احكى احكى..قالت لى: انا اخت العروسة ومدايقة زيك(انا مش مدايقة ولا حاجة هوا انتى هتدايقينى بالعافية)..وقالت لى: اصل خطيبها فى السعودية بيشتغل هناك واهله هما اللى خطبوا له..سالتها: ازاى يعنى هوا ماشفهاش؟ قالت لى: لاء بس اهله شافوها وعجبتهم..سالتها تانى: طب هيا شافته؟؟
ردت عليا: شافت صورته وشافت اهله..(وشافت الشبكة طبعا)..كملت كلامها: هيتخطبوا سنة وبعدين تسافر له بفستان الفرح..(قصدها هيتخطبوا عن بعد سنة ويقضوها نت وتشات وبعد كده تسافر له بفستان الفرح وتبقى كده اتدبست رسمى وهى وحظها بقى) سالتها: يعنى تسافر وتتغرب وتتجوز واحد متعرفوش..قالت لى: تخيلى..انا مش عاجبنى مش عاجبنى .هيا حرة..هتندم.....المهم اختها فضلت تبرطم وتشتم وتزعق وانا سرحت وقعدت افكر وبعد طول تفكير  سالتها سؤال مهم اوى: طيب هتتصور ازاى كده؟؟ اختها بصت لى بصة حسيت منها ان انا غبية: تتصور ازاى ايه يعنى؟؟ قلت لها: يعنى هتتصور من غير عريس ولا ايه؟؟ انا رايى انكم تصوروها لوحدها وبعدين تركبوا صورة العريس معاها بفوتو شوب ..وماتخافوش انااعرف واحد بتاع فوتو شوب كويس اوى..احنا بنحب نخدم  برضه..

الأربعاء، 19 يناير 2011

نسيت الباسوررررررررد!!

اول مرة تحصلى..بجد اول مرة..دى كل الناس كانت بتحسدنى على ذاكرتى القوية ده مفيش اى معلومة كبيرة او صغيرة مهمة او هايفة الا ومتخزنة فى دماغى...انا ايه اللى حصلى؟؟ادى اخرة القر والحسد ..ازاى ادخل على ايميلى فى الهوت ميل يقوم الاستاذ ماسنجر يسالنى هل نسيتى الباسوررد؟؟ وده برضه سؤال يصح انه يتسئل..هوا انا بنسى اى حاجة..دى مشكلتى الاساسية مع جوزى انى بفضل فاكرة له حاجات قالها لى من ايام الهجرة.(. قلبى اسود اوى)..ازاى ده يحصلى..يكونش الجواز بقى والخلفة والحاجات الظريفة دى كلها..مش عارفة بس المفروض الباسوورد دى تكون حاجة مميزة اوى عشان الواحد ماينساهاش بسهولة..يعنى مثلا اسم الام او الاب ..لما اجرب كده..لاء اسمهم مادخلش(طلعت قليلة الاصل) خلاص اجرب اسم جوزى اوتاريخ ميلاده او تاريخ جوازنا يمكن ..لا ء برضه..(قلة اصل رسمى)..طيب اجرب كده اسم بنتى حبيبتى..يا مسهل..لاء برضه..طب اجرب بنتى التانية حبيبتى برضه..لالا..(كده معنديش اى احساس بالمسئولية..ومااستاهلش هدية عيد الام اللى مش بيجيبوها اصلا)..واضح كده ان انا انانية وعندى نرجسية عشان كده هجرب اسمى انا او تاريخ ميلادى..يارب..ها..لاء برضه..احسن اكون انا مش انا ولا ايه..طيب اجرب ايه تانى؟؟ قربت اتخنق ..شكلى هكسر الجهاز واخلص..اكتب رقم موبايلى او تليفون البيت..فكرة برضه..لاء ..لاء مفيش فايدة..اكيد الباسوورد حاجة بحبها..انا بحب لطيفة اوى. وكمان توم هانكس...وبحب الشكولاتة..وبشجع الزمالك..وبحب مصر...مفيش اى حاجة نافعة..واضح ان انا مبحبش حد بالدرجة الكافية عشان اخليه الباسوورد بتاعى..يارب ساعدنى..طيب انا هتخيل انى هعمل باسوورد جديدة واشوف اول حاجة هتيجى على بالى ايه؟؟ايه؟؟ايه؟؟123456...هختار ارقام ورا بعض عشان ماانساش تانى..حاجة سهلة..لما اجرب كده..123456..ايه ده تصدقوا دخل..ياخرابى...ده يظهر بقى ان دى مش اول مرة  انسى فيها..اومال ايه ذاكرتى قوية ومش بنسى وقلبى اسود..المهم الحمد لله انى افتكرت..يووووووووه النت فصل ليه  بقى...اهوا رجع الحمد لله لما اكتب بقى الباسوورد تانى ..هيا كانت ايه؟؟كانت ارقام كده  ورا بعض.. تقريبااربع تصفار..لالا كانوا خمسة باين...اللهم صلى ع النبى..كانت ايه؟؟ كانت ايه؟؟... لما احاول استرجع شريط حياتى تانى من الاول عشان افتكر...

الخميس، 13 يناير 2011

يا ابو دم تقيل!!

حاجة معروفة وبديهية وطول عمرنا بنسمعها وهيا الكلمة الشهيرة(الضحك من غير سبب ...قلة ادب)..كلمة صح مية فى المية..انا مثلا افتكر مرة وانا فى اعدادى وكان عندنا استاذ عربى وبيتكلم عن مقولة(لكل مقام مقال) وبيقول وبيشرح:ما ينفعش مثلا يكون واحد قاعد فى عزا ويضحك لان كده تبقى قلة ادب ومسخرة!! والصراحة هوا قال كده وانا مقدرتش امسك نفسى وانفتحت فى الضحك..طبعا بص لى شذرا وقالى: جرى ايه يا انسة ده احنا لسه بنقول لكل مقام مقال. وقام زغر لى بعينه...بس تعرفوا ان موضوع كتم الضحك ده ممتع اكتر من الضحك نفسه لانك بتبذل جهد عشان تكتم نفسك وبتهيالك انك لو براحتك هتضحك جامد لكن مش شرط ...مرة كنت ف درس وانا فى ثانوى ودخلت واحدة عاملة حاجات غريبة فى وشها وتسريحة شعر عجيبة  ولقيت صحبتى بتقول: يا ماما.!! طبعا مقدرتش امسك نفسى من الضحك..قامت البنت بصت لى بصة مرعبة وقالت  ببواخة: فيه حاجة تضحك؟؟ طبعا انا وصحبتى( منها لله) بقينا فى نص هدومنا..والله لما بفتكر اليوم ده بقول لنفسى طب ماكانت سابتنا نضحك وننبسط ده الضحك حتى بقى غالى دلوقتى يعنى الناس بتدفع فلوس عشان تحضر مسرحية وتضحك ..والضحك بقى لما يجى لغاية عندنا نكتمه..وساعات كمان لما بنضحك جامد بنقول اللهم اجعله خير..طب مااهوا خير وقشطة وكله تمام اهوا وبنضحك ومبسوطين..خايفين من ايه بقى؟؟.مرة واحد زميلى استضفته مذيعة  فى برنامج عن الضحك وسالته: امتى بتضحك؟ قالها بخفة دم : بضحك يوم التلات الساعة خمسة..طبعا المذيعة ضحكت والناس ضحكوا لكن المذيع النكدى(ابو دم تقيل) قاله: انت بتهرج ولا ايه؟؟ ده برنامج عن الضحك يابنى.. ما ينفعش تهرج كده!!.. ايه الرخامة دى ده برنامج عن الضحك يعنى لازم يهرج اومال  يضحك امتى طيب؟؟المفروض الناس لما تلاقى حد عايز يضحك تسيبه عشان الضحك بقى حاجة نادرة اصلا يعنى واحد ضحك فى محاضرة مثلا المفروض الدكتور يسيبه يضحك ويعتبر انه بيعطس يعنى حاجة خارجة عن ارادته ومثلا واحد رايح عزا وحس انه عايز يضحك المفروض اصحاب العزا مايزعلوش منه ويسيبوه براحته  ولو حد  قاعد فى اجتماع شغل وفجأة جاتله كريزة ضحك المفروض مايتكسفش من نفسه لان دى حاجة طبيعية و اللمدير لو كويس واجب عليه يسيبه يسخسخ براحته..واخر حاجة لو كنت بتتفرج على مجلس الشعب ووقعت ع الارض من كتر الضحك..ساعتها تعرف انك انسان طبيعى وكويس وميةمية

الأحد، 9 يناير 2011

الثقة بالنفس


الثقة بالنفس هيا: انك تكون شبه محمود شكوكو وشايف نفسك محمود  عبد العزيز
التقة بالنفس هيا:انك تكون مابتفهمش حاجة فى الكمبيوتر ولا النت وفاكر نفسك احسن من بيل جيتس
الثقة بالنفس هيا انه يكون عندك خمسين سنة وعايش باحساس طفل عنده خمس سنين
الثقة بالنفس هيا: انك تكون بتتغدى فول وفاهم انك واكل سى فووود
الثقة بالنفس هيا انك تكون راكب عربية فيات وفاكر انك راكب عربية فيورا
الثقة بالنفس هيا انك تكون خريج معهد والناس كلها بتقولك يا بشمهندس
الثقة بالنفس هيا انك تكون زملكاوى ومتخيل انك بتشجع رويال مدريد
الثقة بالنفس هيا انك تكون اقرع وكل يوم جمعة تروح للحلاق عادى خالص
الثقة بالنفس هيا انك تكون عايش فى مصر ورايح تتصور جمب برج ايفل
الثقة بالنفس  هيا ان يكون اسمك فتاكات والناس كلها بتنده لك بشاهيناز

الجمعة، 7 يناير 2011

اختبارات مهمة اوى قبل الجواااااااااز

فيه شوية اختبارات لازم ولابد البنت تنجح فيها قبل ماتدبس وتتجوز واول حاجة فيهم: اختبار قوة التحمل يعنى قدرتك على تحمل  حماتك واهل جوزك وجيرانك الجداد وبيتك الجديد وقدرتك على تحمل جوزك نفسه...تانى حاجة قدرتك على العمل تحت ضغط يعنى تبقى لسه طلعة من ولادة قيصرية وتقومى تجهزى الغدا ل سى شعبان جوزك وتلاقى كمان سى شعبولا عازم نص صحابه ع الغدا ويكون عندك دستة عيال ومحدش بيساعدك وماتفتحيش بقك...تالت حاجة القدرة على الاستيقاظ 48 ساعة متواصل ماانتى اصلك مش هتعرفى تنامى من الحلوين الامامير اللى فى البيت وكل ماتخلفى اكتر تسهرى اكتر يعنى ممكن اوى تفضلى اسبوع متواصل صاحية وساعتها ممكن تدخلى موسوعة جينيس...رابع حاجة القدرة على الكذب او ممكن اقولها بطريقة شيك..القدرة على المجاملات العائلية يعنى تضحكى وانتى طهقانة وتعبانة ومش طايقة نفسك وتروحى زيارة عائلية ملهاش لزمة او يمكن بمناسبة عيد ميلاد حماكى التمانين رغم ان ابنك عنده امتحان بكرة الصبح لكن ماينفعش مانحضرش تقطيع التورتة ..واخر حاجة وهيا فى رايى اصعب حاجة..القدرة على نسيان كل اللى انا قلته ده عشان تقدرى تواصلى حياتك وتكملى المسيرة

الله يرحمك يا خيال

الخيال بيلعب دور كبير اوى فى الحب ...طبعا انا مش قصدى الخيال اللى بيظهر فى الظلمة  ع الحيطة لما النور بيقطع لكن  اقصد خيال الحب...يعنى الشخص اللى بيحب بيكون أغلب الوقت عايش فى الاحلام الوردية والبنفسجية والاشعة تحت الحمرا..وتلاقيه يبص للبحر ويسرح لغاية ماتطلعله سمكة قرش تاكل حتة من دراعه او يبص للسما والشمس ويغنى عشان تجيله ضربة شمس فى دماغه..والبعد بيلعب دور فى الخيال وبالتالى فى الحب..يعنى مثلا احنا شايفين القمر من بعيد حلو ومنور لكن لو قربنا منه هنلاقيه شبه معتم ومليان حفر وصخر!!..عشان كده البنت دايما تقول ان الخطوبة أحلى من الجواز عشان طبعا حبيبها وخطيبها كان ملهوف عليها وكانت بتوحشه لكن بعد الجواز بيزهق وبيتخنق لانه بيشوف وشها ليل نهار..اعتقد ان قيس بن الملوح(مجنون ليلى) لو كان اتجوز ليلى كان هيبقى مجنون رسمى..  واحتمال انه كان يتجوز عليها ويجيب لها ضرة..بالنسبة بقى لروميو وجوليت اللى انتحروا من حبهم لبعض..لو كانوا صبروا شوية واتجوزوا كانوا هينتحروا برضه او احتمال جوليت بس اللى كانت هتنتحر وروميو بقى يورثها ويعيش حياته ويتجوز واحدة اغنى منها..أما جاك  بتاع تايتانيك اللى غرق عشان ينقذ حبيبته..لو كان عاش واتجوزها كان هوا اللى هيرميها فى المحيط بعد اول خناقة!! اصل احنا دايما شايفين الحبيب ده اسطورة وحاجة ولا فى الخيال وطول مااهوا بعيد الخيال بيبقى شغال الله ينور..لكن بعد العيال والمسئولية والاقساط والمصاريف بنكتشف ان الخيال والحب والهيام والشوق واللهفة عملوا عملية انتحار جماعى واختفوا خالص..وللاسباب دى كلها احب انصح الاستاذ روميو انه بدل ما يضيع وقته وهوا بيتخيل حبيبته(ياترى هيا بتعمل ايه دلوقتى؟) ويتخيلها بشعرها الطويل البنى (اللى هيا صبغاه) وعينيها الزرقا الجميلة(اللى هيا اصلا لينسيز ) وانها قاعدة تغنى وتلعب مع ولا د اخواتها برقة وعطف..انصح الشاب المخدوع ده انه يعمل زيارة مفاجئة لجوليت خطيبته وهوا هيلاقيها بشعرها( المنكوش) وعينيها(المعمصة) وهيا نازلة ضرب فى اطفال العيلة الابرياء عشان أكلوا  قطعة من الشكولاتة بتاعتها..وبعد كده بقى يقرر deal or no deal

الثلاثاء، 4 يناير 2011

ABC

الطفل اول ما بيتولد بنفضل نعلمه الكلام وبعد حوالى  سنتين ونص او تلاتة يبدأ يقول كلام مفهوم زيينا وبالمناسبة بيبقى رغاى رغى!! تقريبا بيكون مخزن شوية كلام وتعليقات وحاجات كتير شايلها فى قلبه وما بيصدق ان الامور تسلك معاه وينطلق فى الكلام بس احنا اللى دماغنا بيصدع من كتر الحكاوى!!يعنى بنتى دوختنى عشان تتكلم كلام مفهوم وكنت مدايقة وهتجنن عشان تنطق وناس كتير قالوا لى انتى مستعجلة على ايه..بكرة تزهقى!! حتى دلوقتى ليكى مبرر انك تعملى عبيطة ومش فاهمة حاجة منها عشان ماتنفذيش طلباتها!!..وفعلا بعد كده بقيت ببوس ايدها عشان تسكت شوية لانها بقت رغاية ومحشورة فى كل حاجة و بقى ليها رأى ووجهات نظر فى كل حاجة تقريبا!! .. يعنى لو شافتنى بتناقش مع مامتى عن الانتخابات مثلا لازم تتحشر وتقول : كده غلط...الانتخابات دى يع!! ولو سمعتنى بتكلم مع باباها والمناقشة سخنت شوية  لازم تتدخل وتقول: حصل خير يا جماعة صلوا على النبى.--..مش عارفة رغم ان محدش بياخد رايها لكن هيا برضه لازم تعبر عنه من غير ما حد يطلب منها..ومع انى بدايق ساعات من كده لكن بفرح ان ليها رأى فى كل حاجة من أول لون الشوز بتاعتها لغاية تسريحة شعرها وليها ذوق خاص بيها فى الاكل واللبس والاهتمامات وبتحب افلام الاكشن وبتموت فى حمادة هلال .....واكتشفت ان الحاجة الوحيدة اللى انا اخترتها لبنتى بكامل ارادتى هيا اسمها  المكتوب فى شهادة ميلادها..يعنى اخترت اسمها واخترت اسم باباها..لكن غير كده انا ماليش اى رأى معاها...بس يارب يفضل ليها رأى كده لما تكبر والاهم من كده انها  تعبر عنه من غير ماتخاف من حاجة وماتسمحش لاى حد انه يلغى شخصيتها او وجهة نظرها فى اى موضوع ..اصل ماينفعش اتعب معاها السنين دى كلها عشان اخليها تتكلم وفى الاخر هيا تسكت عن حقها..وعشان ده يحصل لازم ما نستهزئش بالطفل لان ده هيخليه جبان وخجول وهيخاف يقول اللى جواه ونحاول نشجعه عشان نزود ثقته بنفسه....اه بالمناسبة انتى ايه رايك يا حبيبتى فى موضوع الضرايب الجديدة؟؟ السؤال ده طبعا مش موجه لموظف فى الدولة ولا لوزير لكن موجه لبنتى اللى عمرها اربع سنين  واللى ردت عليا ببراءة جامدة اوى: انا مش بضرب حد يا مامى واللى بيضرب بيكون naughty!!