الصبح مع الفلول وبالليل مع الثورة

اليومين دول الناس كلها بقت محتارة وفى حالة اضطراب وحيرة وارتباك..والواحد بقى مش عارف ايه الصح وايه الغلط..ده غير ان المنافقين زادوا اوى وبقوا بيدوروا على مصلحتهم مع مين عشان يقتنعوا برايه واللى بقدرة قادر هيبقى رايهم هما كمان....وغير المنافقين فيه ناس ملهاش راى اصلا وكل ماسمعوا راى يعجبهم..وتلاقيهم شوية معاك وشوية يقلبوا عكس رايك خالص. وده مش نفاق منهم لكن قلة وعى وثقافة...والحقيقة الواحد مش عايز يتدايق من الحكاية دى لان احنا عايزين نحترم حرية الراى واحنا عملنا الثورة مخصوص عشان كده ..عشان كل واحد يكون حر فى رايه وتصرفاته ..يعنى لما تشوف واحدة ست كبيرة عندها خمسين سنة بتلعب نط الحبل فى البلكونة ..(هيا حرة) او لما تدخلى على مديرك ف الشغل تلاقيه بيلعب جمباز ومتشقلب على دماغه(عادى برضه مكتبه وهوا حر فيه)ولو واحد عايز يروح شغله من غير هدوم كانه رايح المصيف(حريه شخصيه محدش له حاجة عنده).او واحدة عايزة تاكل سمك بالمكرونة (هيا حرة فى ذوقها اصل اكل السمك مع الرز مش شىء مقدس يعنى).ومفيش قانون بيمنع الحاجات دى وبالتالى كل واحد حر فى حياته ..انا اعرف واحدة بتقوم من النوم تلاقى نفسها مع الفلول وعلى ماتغسل وشها وتفطر تتحول لثورجية ولا اجدع من جميلة بوحريد وبعدين تنام وتقوم ناسية تانى ..عشان كده بنقرصها من رجلها تقوم معدولة على طول وتشكر ف الثورة والثوار وتقول مبارك كان مبوظ البلد وخربها خالص ..منه لله..اسالها : هوا مين اللى منه لله..تقولى: حسنى مبارك..وبعدين تنام وتقوم وتقول: والله صعبان عليا .والله البلد باظت من بعده .كان كويس برضه. ربنا ينصره يارب..اسالها: هوا مين اللى ربنا ينصره؟ تقولى: حسنى مبارك ..انتى سرحانة؟؟(انا برضه اللى سرحانة ده انتى دماغك اللى مهنجة خالص..شوية تدعى للراجل وشوية تدعى عليه..اشوف فيكى يوم ياشيخة) المهم انا سامعاها قاعدة تتكلم وهيا نايمة(ياعينى الست اتجننت ادى اخرة السياسة) وعمالة تقول انا مش ثورة انا مش فلول انا بقيت ام الخلول.. يسارية يسارية ومحدش يقدر عليا( شكلها كده انضمت للحزب اليسارى من ورانا)) ربنا يستر عليها

الصبح مع الفلوا وبالليل مع الثورة

اليومين دول الناس كلها بقت محتارة وفى حالة اضطراب وحيرة وارتباك..والواحد بقى مش عارف ايه الصح وايه الغلط..ده غير ان المنافقين زادوا اوى وبقوا بيدوروا على مصلحتهم مع مين عشان يقتنعوا برايه واللى بقدرة قادر هيبقى رايهم هما كمان....وغير المنافقين فيه ناس ملهاش راى اصلا وكل ماسمعوا راى يعجبهم..وتلاقيهم شوية معاك وشوية يقلبوا عكس رايك خالص. وده مش نفاق منهم لكن قلة وعى وثقافة...والحقيقة الواحد مش عايز يتدايق من الحكاية دى لان احنا عايزين نحترم حرية الراى واحنا عملنا الثورة مخصوص عشان كده ..عشان كل واحد يكون حر فى رايه وتصرفاته ..يعنى لما تشوف واحدة ست كبيرة عندها خمسين سنة بتلعب نط الحبل فى البلكونة ..(هيا حرة) او لما تدخلى على مديرك ف الشغل تلاقيه بيلعب جمباز ومتشقلب على دماغه(عادى برضه مكتبه وهوا حر فيه)ولو واحد عايز يروح شغله من غير هدوم كانه رايح المصيف(حريه شخصيه محدش له حاجة عنده).او واحدة عايزة تاكل سمك بالمكرونة (هيا حرة فى ذوقها اصل اكل السمك مع الرز مش شىء مقدس يعنى).ومفيش قانون بيمنع الحاجات دى وبالتالى كل واحد حر فى حياته ..انا اعرف واحدة بتقوم من النوم تلاقى نفسها مع الفلول وعلى ماتغسل وشها وتفطر تتحول لثورجية ولا اجدع من جميلة بوحريد وبعدين تنام وتقوم ناسية تانى ..عشان كده بنقرصها من رجلها تقوم معدولة على طول وتشكر ف الثورة والثوار وتقول مبارك كان مبوظ البلد وخربها خالص ..منه لله..اسالها : هوا مين اللى منه لله..تقولى: حسنى مبارك..وبعدين تنام وتقوم وتقول: والله صعبان عليا .والله البلد باظت من بعده .كان كويس برضه. ربنا ينصره يارب..اسالها: هوا مين اللى ربنا ينصره؟ تقولى: حسنى مبارك ..انتى سرحانة؟؟(انا برضه اللى سرحانة ده انتى دماغك اللى مهنجة خالص..شوية تدعى للراجل وشوية تدعى عليه..اشوف فيكى يوم ياشيخة) المهم انا سامعاها قاعدة تتكلم وهيا نايمة(ياعينى الست اتجننت ادى اخرة السياسة) وعمالة تقول انا مش ثورة انا مش فلول انا بقيت ام الخلول.. يسارية يسارية ومحدش يقدر عليا( شكلها كده انضمت للحزب اليسارى من ورانا)) ربنا يستر عليها

ياصباح المفاجأت

احلى حاجة فى الدنيا المفاجأت وبالذات لو مفاجأت حلوة بس ساعات الواحد بيبقى عايز يعرف من قبلها لكن ساعتها ماكانتش هتبقى مفاجأة ..وفيه اشخاص بقى متخصصين فى الموضوع ده ومنهم جوزى..انا متهيألى كده ان فى البطاقة بتاعته مكتوب فى خانة المهنة(مفاجأت تخصص توقيع قلب)..مرة واحنا مخطوبين اتصل بيا وقالى : معلش مش هعرف اجى النهاردة ع الغدا عشان انا فى عزا والد واحد صحبى..وقفلت معاه التليفون لاقيته بيرن على الباب وفرحان اوى انه ضحك عليا..مش عارفة دى اسمها مفاجأة بقى ولا مقلب بس لما سالته : انت كده بقى استفدت ايه؟ قالى: انتى كده لما كنتى فاكرة انى مش جاى وبعدين اتفاجئتى انى انا جيت اكيد  طبعا فرحتى اكتر...ومرة تانية برضه كنا رايحين السينما وكان فيه فيلمين بنختار بينهم فيلم بوحة وفيلم السفارة فى العمارة وقلت له انا عايز ادخل عادل امام..قالى : وانا عايز محمد سعد بس عشان خطرك هندخل عادل امام..ودخل يحجز وجأه يقولى: معلش ما لاقيتش تذاكر لعادل امام خالص فحجزت بوحة..قلت له: ياخسارة..وبعدين قعد يكلمنى ويشغلنى لغاية مادخلنا جوة وااتفاجئت انه فيلم السفارة فى العمارة وطبعا ضحكت ..ساعتها بقى قالى: شفتى ضحكتى ازاى ؟انتى كده انبسطتى اكتر..وطبعا لازم تتخيلوا لما تبقى الحياة كلها كده يعنى اقوله هاتى لى شكولاتة وانت جاى ..وبعد مايوصل يضرب بايده على دماغه ويقولى: اخ ده انا نسيت خالص..ارد عليه ببرود: مش مشكلة عادى عادى..يقوم ضاحك ضحكته البريئة ويطلع من جيبه الشكولاتة..وطبعا انتوا عارفين قال ايه..(كده طبعا انبسطتى اكتر)..ونفسى اقوله انى والله فى الحالتين هنبسط بس طبعه كده نعمل ايه..والصراحة مهما احاول اقلده مبعرفش لانه بيبان عليا اوى وبفضح نفسى بنفسى ويكبس عليا الضحك فى نص الكلام ويقفشنى على طول..(عقبالى مااقفشه مرة)..اخر مرة يوم عيد ميلادى ولقيته ساكت كده ومطنش..والوقت عمال يعدى وقربنا ندخل على اليوم اللى بعده ..قلت لنفسى اكيد عامل مفاجاة فظيعة ومخبيها بس هيفضل مخبى لامتى؟؟ والساعة كانت حوالى 10 بالليل وسالته: ايه انت مش ناسى حاجة؟قالى: حاجة زى ايه؟ قلت له: هوا شهر 10 مش بيفكرك بمناسبة مهمة..قالى: اهههههه ..هوا فيه حد ينسى نصر اكتوبر العظيم؟؟ فرحتينى والله على كده يبقى بكرة اجازة؟؟ قلت له : انت هتستعبط ..بلاش بقى موضوع المفاجات ده..قالى باستغراب اوى: مفاجات؟قصدك ايه؟عايزة يعنى تسافرى فى حتة يوم الاجازة؟؟ ماشى فكرة حلوة ايه رايك نروح الساحل؟؟  (طب اقوله ايه الراجل ده احسن يكون ناسى بجد ..ده كده يبقى ليلته مش هتعدى..بس استحالة استحالة اكيد عامل مفاجأة)..المهم قعدت اتدور على هدية مخبيها او تورتة فى التلاجة مخدتش بالى منها ولا حاجة..بس مالاقيتش حاجة..رحت قلت له بصراحة بقى: انت ناسى ان النهاردة عيد ميلادى؟؟ تنح كده لمدة دقيقة وحسيت من بصه عينه انه كان ناسى فعلا..لكن لحق نفسه وقالى..لا مش ناسى طبعا ده انا حتى عاملك بكرة مفاجأة تجنن..

قبل 25 وبعده

قبل 25:الاطفال بيلعبوا استغماية

بعد 25: الاطفال بيلعبوا انهم فى لجان شعبية وبيمسكوا عصاية لعبة أو بيلعبوا انهم متطوعين لدهان حيطان الشقة

قبل 25: قنوات الاطفال المفضلة هيا سبيس تون  وبراعم والجزيرة اطفال

بعد 25: القنوات المفضلة هيا العربية والحرة والجزيرة مباشر

قبل 25: الاطفال كانوا بيناموا على اغانى ماما زمانها جاية وبابا فين؟

بعد 25: بقوا بيناموا على ماشربتش من نيلها ويابلادى ويا حبيبتى يامصر

قبل 25: الخروجة المفضلة للاطفال هيا الملاهى والنادى

بعد 25: الخروجة المفضلة هيا ميدان التحرير او عند اقرب دبابة عشان يلعبوا ويتصوروا جمبها

قبل 25: الاطفال بيشتروا عروسة  ومطبخ ومسدس مية

بعد 25: الاطفال بيشتروا علم مصر و شومة ودهان لزوم الشغل
قبل 25: اكسسوارات بناتى كانت توك على شكل فراشة  ولونها بينك او موف
بعد 25: توك على شكل علم مصر والوانها معروفة طبعا(احمر-ابيض-اسود) ونسر فى النص

قبل 25: مثل الاطفال الاعلى هوا تامر حسنى

بعد 25: مثلهم الاعلى هوا وائل غنيم

قبل 25: اى ست حامل بتسمى مولودها (عمر )لو ولد و(مريم) لو بنت

بعد 25: لو ولد هتسميه( نصر) او( تغيير)  ولو بنت هتسميها (حرية) او(سلمية) او( ثورة)
قبل 25: دردشة بين البنات بتكون عن النيو لوك بتاع حماقى او فستان نانسى
بعد 25: الدردشة عن بلوفر احمد شفيق او البدلة بتاعة عمرو موسى
قبل 25: كل واحدة  بتغيظ صحبتها برسايل خطيبها ع الموبايل
بعد 25: بتغيظ صحبتها( القوات المسلحة بعتوا لى وانتى لاء)
قبل 25: صورة البروفايل طفلة ماسكة وردة فى النادى
بعد 25: صورة البروفايل طفلة ماسكة بندقية على الدبابة
قبل 25: اى حفلة عيد ميلاد بيغنوا فيها عقبالك يوم ميلادك
بعد 25: بيفتتحوا الحفلة بالنشيد الوطنى
قبل 25: كان 25 يناير عيد الشرطة
بعد 25: بقى 25 يناير عيد الثورة

لازم اشارك

الجماعة جيراننا الى فوق هاديين اووى وما بيطلع لهم صوت خالص..ورغم ان الناس كلها عارفة ان حالتهم صعبة وان باباهم تقريبا مش بيصرف عليهم وبيحرمهم من حاجات كتير لكن تلاقيهم برضه اغلب الوقت مبتسمين وراضيين ...مش عارفة ده ضعف منهم ولا جبن ولا رضا ولا احترام...لكن من فترة بدأت الاحظ عليهم التعاسة ..مابقوش بيضحكوا زى الاول..دايما اشوفهم سرحانين وساكتين ولو حد كلمهم يتعصبوا عليه...قلت لنفسى اكيد باباهم لسه بيعاملهم وحش ..او يمكن هما ناويين يتمردوا..ومن كام يوم ..صحيت من النوم على صوت خناقة وكان عندى فضول اعرف ايه اللى بيحصل لكن قلت لنفسى: وانا مالى...وفى اليوم التانى سمعت صوت خناقة بس اعلى شوية المرة دى..قلت لنفسى تانى: مالكيش دعوة ..خليكى فى حالك...بس سمعت ولاد الراجل اللى فوق بيعيطوا وبيترجوه: يابابا حرام عليك ..كفاية..كفاية ..(طبعا يقصدوا كفاية ظلم وكفاية بخل وكفاية قهر وكبت)..وسمعت بنته بتترجاه: يابابا انا نفسى تشترى لى فستان جديد وابنه التانى بيترجاه: يابابا نفسى تدينى مصروف محترم زى اى اب...الحقيقة قلبى اتقطع عشانهم بس برضه وانا مالى..ربنا يهديه بقى...وحاولت ادخل على النت عشان اكلم جارتى على ايميلها لكن لاقيت النت مقطوع.. اتارى الراجل المفترى قطع اسلاك النت من العمارة كلها...اكلمها على الموبايل اتطمن عليها وخلاص..موبايلها مقفول..الراجل ده زودها بجد...خلاص بقى انا عملت اللى عليا..ايه ده الراجل ده اتجنن؟؟(جوزى اللى بيقول).. سالته: حصل ايه؟؟ قالى: شفته وانا جاى بيضرب فى عياله لدرجة واحد منهم جاله ارتجاج فى المخ وحالته خطيرة..انا لازم اطلع ازعق له ..ده هيموت عياله..قلت له: لاء وانت مالك انت احسن يضربك
قالى: مش احسن مااكون سلبى..قلت له: هوا باباهم واكيد بيخاف عليهم
قالى: مش شرط..ياما اباء قتلوا ولادهم زى الدبة اللى قتلت صاحبها
سالته: ايه حكاية الدبة دى؟؟
قالى: دبة حاولت تقتل الذبابة اللى على صاحبها من فرط حبها ليه لكن وهيا بتقتل الذبابة قتلت صاحبها عشان حمقاء
قلت له: بس مش هتوصل للدرجة دى
قالى: خلاص براحتك  لو مش عايزة تيجى  ماتجيش لكن اناهطلع وماتطلبيش منى مااطلعش لان اصلا سكان العمارة كلهم فوق لان كلهم مش بيحبوا الراجل ده
فكرت شوية بس رجعت قلت لنفسى: انا ماشفتش حاجة وحشة اوى من الراجل ده..ظالم بقى مفترى ..وانا مالى
المهم جوزى طلع وانا كنت مرعوبة وصوت الصريخ ابتدى يزيد وسمعت صوت ضرب وصوت مسدس..(يانهار اسود مسدس لما اطلع اشوف فيه ايه)
طلعت لفوق وانا خايفة من المنظر اللى هشوفه..لاقيت جوزى مضروب برصاصة فى رجله..قلت له وانا بعيط: قلت لك ماتطلعش
قالى وهوا مبتسم: مكانش ينفع اسكت عن ظلم بشوفه..ولاد الراجل ده كانهم ولادى..
قلت له: طب ياللا نروح مستشفى بسرعة ..رد عليا الراجل المفترى: مفيش نزول خلاص..انا حبستكم كلكم هنا..شوفوا مين هيلحقكم..جريت على التليفون بسرعة لقيته شايل الفيشة وموبايلى نسيته تحت فى الشقة..ماكانش قدامى غير انى اصرخ زيهم..كفاية بقى ..كفاية ظلم..رد بمنتهى القسوة: كفاية ايه ..انتوا عمركوا شفتوا منى حاجة وحشة..؟؟
قلت له: ولا شفنا حاجة حلوة..وعلى فكرة انا كنت بدافع عنك لكن انا اتاكدت انى كنت غلطانة وكنت عاطفية زيادة عن اللزوم ..انت راجل مستبد وظالم وماعندكش قلب ولا رحمة ..كفاية بقى
سالنى: كفاية ايه؟؟ يعنى اسيب بيتى..انا هعيش واموت فى بيتى وان كان عاجبكم..
بنته قالت له: احنا مش عايزينك تسيب بيتك....عايزينك بس ترتاح واحنا اللى هنمشى امورنا بمعرفتنا...يمكن نغلط او نتكعبل فى الاول لكن عايزين نحاول..عايزين بس فرصة..يمكن نثبت لك ان احنا اللى صح...احنا عايزين نعيش لكن انت عايزنا نموت..عايزين نتكلم وانت بتطلب اننا نسكت
رد عليها من غير اى احساس: لاء كلمتى هيا اللى هتفضل وانا اللى همشى الامور زى الاول وانا مش تعبان عشان ارتاح..
بنته بترجاه: يابابا بلاش عند..العند مش بيحل العند بيعقد الامور اكتر
الاب المفترى: انا بعمل اللى شايفه صح..
حاولت اترجاه: طب افتح الباب بس عشان خاطرنا..انت ابنك هيموت  وجوزى متصاب حرام عليك..
قالى: افتح بشرط واحد..
قلت له: ايه هوا الشرط؟
قالى:تقنعيهم ما يطالبوش بحقهم...
قلت له: مقدرش اقنعهم لانه حقهم..وخلاص هما عرفوا ازاى يعبروا عن رايهم وعمرهم ماهيسكتوا تانى..
قالى بتحدى: رايهم؟ شوية العيال دول ليهم راى؟؟
ابنه  الكبير قاله: احنا مش عيال ..احنا بقينا رجالة.. ولينا راى وبنطلبه بادب
الراجل المفترى: اخر كلمة عندى..طول ماليكم مطالب هتفضلوا محبوسين عندى هنا..ومفيش خروج ولا فيه اكل ولا تليفونات ..
حاولت اترجى بنته: خلاص كفاية طلبات عشان  خاطر جوزى يروح المستشفى وعشان اخوكوا هيموت..عشان خطرى كفاية..مفيش فيه امل
بصوا لى بانكسار وقالوا لباباهم المفترى: خلاص ..احنا هنسكت ومش هنطلب حاجة مدام انت هترتاح كده
ضحك ضحكة المنتصر واتصل لى بالاسعاف..والاسعاف جات واخدت جوزى واخدت الولد...ومن يومها وانا مش بسمع صوتهم ابدا..لا بسمع خناق ولا صريخ ولا ضرب..وبقيت بشوفهم فى الشارع زى زمان بس مابقوش بيضحكوا ولا  بيبتسموا ولا حتى سرحانين..وشهم مليان انكسار وخنوع..سالت بنتهم لما شفتها: بابا عامل معاكم ايه دلوقتى؟؟
ردت بحسرة: اوحش من الاول
قلت لها: بس هوا وعدنا
قالت لى: اللى زيه مالوش وعد
قلت له بثقة: خلاص نجمع سكان العمارة كلهم تانى ونجيب حقكوا
قالت لى بضعف: بعد ايه؟؟..مش هنقدر نقف قصاده تانى
سالتها: طيب اخوكى خرج من المستشفى؟
ردت بحزن:اخويا مات..وكلنا هنموت بعده

عروسة من غير عريس

كنت معزومة على خطوبة واحدة معرفهاش اوى الصراحة بس قلت اروح عشان اجامل وابارك وعشان ماما كانت عايزة تاخدنى معاها (تقريبا عايزة حد يسليها فى السكة) المهم رحنا بيت العروسة(بيت باباها يعنى) عشان هيا اصلا خطوبة عائلية..والعروسة كانت زى العسل واللهى..امورة وشيك وعسل وقاعدة تضحك زى الهبلة..انا بدأت اقلق هوا العريس اتاخر ليه يا جماعة؟؟ المواصلات برضه؟؟ معلش الغايب حجته معاه..!!بس غريبة اوى العروسة بتضحك وفرحانة(شكلها فرحانة انه مجاش يمكن تكون مامتها غصباها ع الخطوبة ولا حاجة..ع العموم وانا مالى)...ماما اتنرفزت منى: وانتى مالك ماتخليكى فى حالك..بطلى رغى شوية يا مملة..(الله يسامحك ياماما الحق عليا انى جيت معاكى ..هيا دى اخرتها)..المهم بعد حوالى ساعة لقيت ابو العريس(الغايب) هوا اللى بيلبس العروسة الشبكة...(يمكن العريس بيتكسف ولا حاجة)..هوا العريس فين ياجدعان؟؟هوا عنده شغل ولا حاجة؟؟يمكن عنده اجتماع مهم او معرفش ياخد اجازة النهاردة.او يمكن تقلان ع العروسة (بيدبح لها القطة من اولها جدع برافو عليه)..ماما زغدتنى فى رجلى: اخرسى شوية..اخر مرة اخدك معايا فى حتة...(مش عارفة  ليه حسيت من تهديد ماما انى انا لسه طفلة وانها مش هتجيب لى حاجة حلوة)..المهم فيه واحدة ظريفة قربت منى وقالت لى وهيا فرحانة اوى: بصى انا ارتحت لك وهقولك (هوا سر شويبس ولا ايه)..رسمت ضحكة وقلت لها: اتفضلى احكى احكى..قالت لى: انا اخت العروسة ومدايقة زيك(انا مش مدايقة ولا حاجة هوا انتى هتدايقينى بالعافية)..وقالت لى: اصل خطيبها فى السعودية بيشتغل هناك واهله هما اللى خطبوا له..سالتها: ازاى يعنى هوا ماشفهاش؟ قالت لى: لاء بس اهله شافوها وعجبتهم..سالتها تانى: طب هيا شافته؟؟
ردت عليا: شافت صورته وشافت اهله..(وشافت الشبكة طبعا)..كملت كلامها: هيتخطبوا سنة وبعدين تسافر له بفستان الفرح..(قصدها هيتخطبوا عن بعد سنة ويقضوها نت وتشات وبعد كده تسافر له بفستان الفرح وتبقى كده اتدبست رسمى وهى وحظها بقى) سالتها: يعنى تسافر وتتغرب وتتجوز واحد متعرفوش..قالت لى: تخيلى..انا مش عاجبنى مش عاجبنى .هيا حرة..هتندم.....المهم اختها فضلت تبرطم وتشتم وتزعق وانا سرحت وقعدت افكر وبعد طول تفكير  سالتها سؤال مهم اوى: طيب هتتصور ازاى كده؟؟ اختها بصت لى بصة حسيت منها ان انا غبية: تتصور ازاى ايه يعنى؟؟ قلت لها: يعنى هتتصور من غير عريس ولا ايه؟؟ انا رايى انكم تصوروها لوحدها وبعدين تركبوا صورة العريس معاها بفوتو شوب ..وماتخافوش انااعرف واحد بتاع فوتو شوب كويس اوى..احنا بنحب نخدم  برضه..

نسيت الباسوررررررررد!!

اول مرة تحصلى..بجد اول مرة..دى كل الناس كانت بتحسدنى على ذاكرتى القوية ده مفيش اى معلومة كبيرة او صغيرة مهمة او هايفة الا ومتخزنة فى دماغى...انا ايه اللى حصلى؟؟ادى اخرة القر والحسد ..ازاى ادخل على ايميلى فى الهوت ميل يقوم الاستاذ ماسنجر يسالنى هل نسيتى الباسوررد؟؟ وده برضه سؤال يصح انه يتسئل..هوا انا بنسى اى حاجة..دى مشكلتى الاساسية مع جوزى انى بفضل فاكرة له حاجات قالها لى من ايام الهجرة.(. قلبى اسود اوى)..ازاى ده يحصلى..يكونش الجواز بقى والخلفة والحاجات الظريفة دى كلها..مش عارفة بس المفروض الباسوورد دى تكون حاجة مميزة اوى عشان الواحد ماينساهاش بسهولة..يعنى مثلا اسم الام او الاب ..لما اجرب كده..لاء اسمهم مادخلش(طلعت قليلة الاصل) خلاص اجرب اسم جوزى اوتاريخ ميلاده او تاريخ جوازنا يمكن ..لا ء برضه..(قلة اصل رسمى)..طيب اجرب كده اسم بنتى حبيبتى..يا مسهل..لاء برضه..طب اجرب بنتى التانية حبيبتى برضه..لالا..(كده معنديش اى احساس بالمسئولية..ومااستاهلش هدية عيد الام اللى مش بيجيبوها اصلا)..واضح كده ان انا انانية وعندى نرجسية عشان كده هجرب اسمى انا او تاريخ ميلادى..يارب..ها..لاء برضه..احسن اكون انا مش انا ولا ايه..طيب اجرب ايه تانى؟؟ قربت اتخنق ..شكلى هكسر الجهاز واخلص..اكتب رقم موبايلى او تليفون البيت..فكرة برضه..لاء ..لاء مفيش فايدة..اكيد الباسوورد حاجة بحبها..انا بحب لطيفة اوى. وكمان توم هانكس...وبحب الشكولاتة..وبشجع الزمالك..وبحب مصر...مفيش اى حاجة نافعة..واضح ان انا مبحبش حد بالدرجة الكافية عشان اخليه الباسوورد بتاعى..يارب ساعدنى..طيب انا هتخيل انى هعمل باسوورد جديدة واشوف اول حاجة هتيجى على بالى ايه؟؟ايه؟؟ايه؟؟123456...هختار ارقام ورا بعض عشان ماانساش تانى..حاجة سهلة..لما اجرب كده..123456..ايه ده تصدقوا دخل..ياخرابى...ده يظهر بقى ان دى مش اول مرة  انسى فيها..اومال ايه ذاكرتى قوية ومش بنسى وقلبى اسود..المهم الحمد لله انى افتكرت..يووووووووه النت فصل ليه  بقى...اهوا رجع الحمد لله لما اكتب بقى الباسوورد تانى ..هيا كانت ايه؟؟كانت ارقام كده  ورا بعض.. تقريبااربع تصفار..لالا كانوا خمسة باين...اللهم صلى ع النبى..كانت ايه؟؟ كانت ايه؟؟... لما احاول استرجع شريط حياتى تانى من الاول عشان افتكر...