المفروض ان كل واحد مهنته تعبر عنه يعنى الشغلانة اللى انت بتشتغلها تبان عليك وعلى طريقة لبسك واسلوب كلامك وشخصيتك لانك لازم تتاثر بمهنتك..انا مثلا مااقتنعش لو شفت دكتور ريجيم تخين اصلها مالهاش غير معنى واحد وهوا ان الدكتور ده فاشل فى انه يخسس نفسه طب يبقى هيخسس الناس ازاى؟؟ ومااقتنعش لو شفت شيف(طباخ) رفيع ومعصعص لان برضه دى معناها ان طبيخه وحش بقى او يمكن هوا اللى مابيحبش الاكل(جايز برضه)!!..فيه كمان مهن لازم تكون صحبتها جميلة جدا طول الوقت زى الممثلة لازم دايما تخرج وهيا على سنجة عشرة اصل افرضوا شافت حد من المعجبين بتوعها وكانت مش حاطة مكياج!! ساعتها الراجل اللى شافها هيروح يفضحها ويقول دى وحشة خالص ع الطبيعة و شبه العفريتة وطبعا مش هيبقى ليها معجبين بعد كده..الكوافيرة برضه لازم تفضل حاطة ميك اب على وشها 24 ساعة عشان تبقى مقنعة بالنسبة لى..الموديل برضه لازم تكون دايما رشيقة وغالبا بتكون طويلة كمان..مهنة بقى مصممة الازياء لازم تفضل انيقة طول الوقت وماينفعش مرة تستعبط وتلبس حاجة عادية..انا مرة سمعت مصممة ازياء فى التليفزيون بتقول للمذيع: بالنسبة للفستان اللى انا لابساه ده لونه جديد جدا تقدر تقول لونه فحلقى (بضم الفاء واللام )اما الشوز بقى لونها بحلقى( بضم الباء واللام)..الصراحة حسيت ساعتها انها مصصمة جلاليب مش ازياء!!بالنسبة بقى للحلاق لازم يكون دايما حالق شعره ع الزيرو عشان يثبت انه بيحلق كويس..والنجار لازم تلاقيه حاطط قلم رصاص ورا ودنه لكن لو لاقيته حاطط قلم جاف تعرف على طول انه مش متمكن من مهنته..والجزار لازم يكون بشنب مش عارفة ليه تقريبا عشان الخروف يخاف منه ويعمل له الف حساب..لكن التاجر او اللى عنده سلسلة محلات لازم تلاقيه لابس خاتم ذهب فى صابع ايده الصغير.!!.الدكتور بقى غالبا تلاقيه لابس نظارة( من كتر ما بيذاكروا ويدحوا نظرهم لازم يضعف طبعا)..ده غير ان الدكتور بتلاقيه وقور كده وراسى رغم انى مرة رحت لدكتورة اطفال عشان بنتى وبمجرد ما دخلت لاقيت الدكتورة شغلت اغنية( جدو على) وطلعت بالونة من درج المكتب وقاعدة تنفخ ..حسيت ساعتها انى دخلت سيرك مش عيادة..هوا الطب باظ من شوية!! مهندس الكمبيوتر غالبا برضه تلاقيه لابس نظارة من كتر قعدته ع الكمبيوتر طبعا وغالبا بتلاقيه تخين شوية لانه طول مااهوا قاعد كده عمال يلغ فى ساندوتشات غير انه ما بيتحركش كتير..مهندس الاتصالات بقى اكيد هتلاقيه بيرغى فى الموبايل طول النهار ...اغلب اللى بيشتغلوا فى التدريس هتلاقيهم ماشيين دايما بورقة وقلم فى شنطتهم وهتعرفهم من طريقتهم على طول..اعرف واحدة مديرة مدرسة لما بنروح نزورها فى البيت تقول لنا: اهلا وسهلا..اتفضلوا جلوس..ولو غلطت وقاطعتها فى نص الكلام ممكن تعاقبنى وتقولى قومى اقفى وارفعى ايدك لفوق..اللى بيشتغلوا بقى فى السياحة تلاقى فشتهم عايمة على طول.انت تدخل شركة سياحة مثلا وتقول للموظفة: مساء الخير..تلاقيها ترد عليكى بابتسامة كبيررة: مساء النور يا فندم هىء هىء.احنا عندنا رحلات روشة طحن هىءهىء هتعجبك اوى هىءهىء..(تقريبا بعد كل جملة ضحكة ).وفيه مهن تقليدية يعنى الضابط هتلاقيه طبعا منضبط اوى ومش بيعاكس البنات والسواق لازم تلاقيه رغاى ومندوب المبيعات لازم يجادل كتير فى الكلام وكل ماتتكلم معاه فى موضوع بسيط يقولك: يا تقنعنى يا اقنعك..كأنه هياخد عمولة منك فى الاخر لو اقتنعت بكلامه .وفيه فكرة احنا واخدينها من الافلام عن الفنان التشكيلى انه دايما ناكش شعره او المنتج انه دايما بكرش 4 متر قدامه او المصور انه دايما لابس نظارة شمس وكاسكتة. والمخرج لازم يكون عصبى وبيزعق دايما ولابس صديرى اما بقى بالنسبى للحرامى لازم تلاقيه لابس تى شيرت ابيض ومخطط باسود بالعرض!!.....انا اللى شاغلنى دلوقتى حاجة تانية..ياترى الصحفى او الكاتب المفروض يكون ايه شكله او شخصيته؟؟ اكيد الصحفى هيكون هادىء نوعا ما لانه مش بيعرف يعبر عن نفسه غير بالورقة والقلم لكن الصراحة انا قابلت مرة صحفى وكان رغاى رغى بس للامانه هوا كان سواق تاكسى كمان يعنى بيشتغل صحفى وسواق ويظهر انه اتاثر بمهنة السواق اكتر..
ليست هناك تعليقات:
إرسال تعليق